Берцинал рагIаби
Берцинал рагIаби
ГIалимзабазул султIан имам ГIизуддин ибну ГIабду-саламица абуна: «Суфизаби руго, дунялгун ахират хвезе течIого, шаригIаталъул хIукмаби ккурал чагIи. Цогиял абуни руго диниял гIадатал ккураллъун. Суфизабаздаса лъугьунел караматалгун гIадаталдаса рахъун ккарал жалаз гьеб баянги гьабулеб буго…», - ян.
Ибну Халдуница абуна: «Гьаб буго миллаталъулъ баккараб шаргIиял гIелмабазул цо гIелму. Гьелъул аслуги, гьаб къавмалъул тIарикъат буго жиб салафу-салихIуназулъги гьездаса чIахIиязулъги, гьединго, табигIиналгун сахIабазулъги жиб букIараблъун бугеб. ЛъикIалде тIоритIиялъул ва хIакъаб жоялъул нух. Гьелъул аслуги буго гIибадаталда чIей, Аллагь ﷻ тун батIиялдаса Гьесде ﷻ свери, дунялалъул берцинлъабаздаса руссин ва гIадамал жинде гьетIизарулеб лазатаздаса, боцIи-малаздаса, тIадегIанлъиялдаса зугьд гьаби, гIибадаталъе халваталъулъ халкъалдаса гIицIлъи. Гьеб жоги букIана салафуназулъгун асхIабзабазулъ тIибитIараблъун. КIиабилеб, лъабабилеб гIасруялъулъ гIадамазул дунялалде руссин тIибитIараб гIадатлъун лъугьиндал, гIибадат гьабиялда ругезда абизе байбихьана суфизабийин абун».
Сайид хIафиз МухIаммад Сидикъ ал-Гъамариясда цIехедал тасаввуф бугищин Аллагьасул ﷻ рахъалдаса илгьам гьабун бачIараб жойин абун, гьес гьадинаб жаваб гьабуна: «Тiарикъаталъе тIоцебе кьучI лъурав чи нилъеда лъала ва гьелъул байбихьи зодоса вахIю бачIараб МухIаммадияб диналъул аслуялдаса буго. Шайгурелъул, щаклъи гьечIого гьеб буго ихIсаналъул макъамалда, гьединаб ихIсан диналъул рукнабазул цояблъун бугеб, жибги Аварагас ﷺ, диналъул кIиябго тIоцебесеб рукну баян гьабун хадуб, рехсей гьабиялдалъун мухIкан гьабураб: «Гьев вукIана (асхIабзабигун гIодор чIараб бакIалде Аварагасухъе ﷺ вачIана цояв ва цIех-рех гьабуна диналъул. Гьесие жаваб гьабун Бичасул Расуласги ﷺ бицана щиб кколебали иман, ислам, ихIсан) ЖабрагIил малаик, нужеда дин малъизе вачIарав. Гьебги ккола иман, ислам, ихIсан. Ислам буго тIагIат ва гIибадат. Иман – у рва гIакъидат. ИхIсан – макъам, муракъабат ва мушагьадат (Аллагьасда ﷻ вихьулев гIадин ихласалда гIибадат гьаби).
Агьлу-суннаталъулъ суфи абун тIоцебе жинда цIар тарав Абу-Гьашим ас-Суфияв вуго. Гьев вукIана гIадамаздаса ватIачIарав, калам лъикIав…», - абун.
