Нечеялъул хIакъикъат
Диналда жаниб ничалъ кIудияб бакI ккола. Гьеб буго иманалдаса. Нечей абураб жо, гIодовеги валагьун, вуцIцIунчIей гуро. Гьелда ничиланги абуларо. Нечеялъул хIакъалъулъ гьадинаб баян кьун буго ХIилми абурав шайихас: «Нечеялъул хIакъикъат ккола мунго какиялдаса, квешаб рагIи дурго рахъалъ абиялдаса цIуни. Щайин абуни, нечолев чияс жив какулебщинаб квешаб пиша тола», - ян.
ТIадегIанав Аллагьас ﷻ абунин буго: «Я Адамил лъимер, мун Дидаса нечани Дица дур гIайибал ва мунагьал ракьалда кIочон тезарила. Дур гIамалал хъвалеб тIехьалдаса гъалатIалги рацIцIина. Амма мун нечечIони, къиямасеб къоялъ хIисаб букIине буго», - ян.
ХIисаб гьабеха, нечолищ нилъ ТIадегIанав Аллагьасукьа ﷻ нилъго хутIараб мехалда. ГIемерисеб мехалда нилъ гIадамаздаса нечолел ратула. Амма нилъго ругеб мехалда бокьа-бокьараб жо гьабула. Гьеб я ихласлъун я ничлъун кколаро.
ТIадегIанав Аллагьас ﷻ ГIиса аварагасда, вахIю рещтIун, абуна: «Цин дурго напсалъе вагIза гьабе ва цинги мун Дидаса неча гIадамазе вагIза гьабиялдаса», - ян.
Сулайман аварагас абуна: «Нич иманалъул къанун буго. Низам гьечIони, хутIараб жоги уна», - ян.
ГIаишатица абуна: «ЛъикIал тIабигIатазул аслу ккола нечей», - абун.
Фузайл ибн ГIиязица абуна: «ТалихIкъосиналъул щуго гIаламат буго: рекIелъ къасаватлъи, берал ракъвай, нечей дагьлъи, дунялалде хьул лъей ва хьул цIикIкIин», - ан.
Гьединго Фузайл ибн ГIиязица абуна: «Дуца дурго гIунгутIаби рахчула ва гIадамаздасаги нечола. Амма нечоларо ракIалда жаниб бугеб Къуръаналдаса, Жиндие щибниги балъголъи гьечIев Аллагьасдаса», - ян.
Нечолев чияс берал ххенезаруларо, ай кколареб бакIалде валагьуларо. БакI-бакIалде гIемер валагьулев чиясул рекIелъе къваригIел гьечIеб хIал бачIуна.
Лукъманул ХIакимида гьикъула фасикъасул хIакъалъулъ. Гьес абула: «Фасикъ ккола жинца гIадамазул кIалтIаса бер нахъе босуларев ва гьезул гъалатIал рищулев чи», - ян.
МухIаммад авараг ﷺ ккола бищун цIикIкIун нечолевлъун ва гьелдаго цадахъ авараг ﷺ вукIана гIадамал рокьулев ва гьелгун жуварав. ГIалимзабазул рагIиялда рекъон, нилъеда бичIчIана нич кколеблъи жиндаго тIаде мекъабщинаб жо бачIине биччангутIи ва гIадамаздаса нечолевгIадин Аллагьасдасаги нечей, ай живго хутIидал мунагьал гьаруларевлъун.
