КватIун ккелалде…
Лъимал ккола нилъ хисизе ругел чагIи. Гьединлъидал лъималазе тарбия кьеялде исламалъ кьола кутакаб кIвар.
Кинабго жо лъалеблъун бижуларо лъимер. Гьелда сверухъ ругез кьола гьелъие тарбия. Ва гьелда рекъон кIудияб гIола лъимерги.
Щивав чиясда тIадаб буго жиндирго дин лъазабизе ва гьелда гIамал гьабизе. Дин лъазабиги инсанас гьитIинаб къоялдаса нахъе байбихьула, ай эбел-инсуца малъиялдалъун.
Бичасул аварагас ﷺ абуна: «Анкьго сон байдал как байилан лъималазда амру гьабе ва анцIго сон байдал кьабгIе (как таралъухъ), бусенги батIа гьабе (васал-ясазул)», - ян (Давуд, ХIаким).
Лъималазе тарбия кьей, гьезул сонал халгьабун, лъабго гIужалде бикьула: гьавуралдаса анкьго сон базегIан, анкьго соналдаса анцIго соналде щвезегIан ва анцIгоялдаса балугълъиялде рахинегIан.
Анкьго сон базегIан лъималаздехун рукIине ккола хIеренго. ЗахIматал хIалтIабиги гьезда тIадкъазе бегьуларо, гьездехун хъачIаллъунги рукIинаро.
Анлъго-анкьго сон баралдаса как-кIал малъизе байбихьила ва лъикIаб гIамалалде гьесизарила.
АнцIго сон баралдаса балугълъиялде щвезегIан диналъул парзал тIуразари, гIадамазда гьоркьов берцинго вукIа-вахъин тIалаб гьабизе ккола. ГIенеккулел гьечIони, тамихI гьабизеги ккола. Жинс батIиял лъималазул бусенги батIа гьабила.
ГьитIинаб къоялдаса нахъе лъималазда лъикIаб мисал бихьизабуни ва исламалда рекъараб тарбияги кьуни, кIудиял гIедалги гьеб тарбия, ганчIида бикIараб накъиш гIадин букIуна.
Амма гьеб гIужалда нилъ тохлъун, лъимер квешаб жоялде ругьунлъидал, битIараб нухде гьеб лъугьинабизе цIакъ захIмалъула. Цинги, щиб нилъеца бицаниги кватIун букIуна. Лъимералъ гьеб къабул гьабуларо.
Аллагьас ﷻ кумек гьабеги!
