Нахъбуссунеб
Сахаватлъи рикIкIуна бищунго тIадегIанал хаслъабазул цояблъун ва хъантIи рикIкIуна заманалдасан инсанги гьесул гIумруги хвезабулеб ракIалъул унтилъун. ГIелалъ гIелалъухъе кьун рицунел лъай кьеялъулал харбаздасан якъинго бихьула инсанасул ишал гьесухъе тIадруссунел рукIин, цо-цо мехалда ракIалдаго гьечIого.
Пуланай гIадан росасе ун йиго бечедав базарганасе. Гьесул букIана ретIел-хьит бичулеб тукен. Амма кигIан бечедав вукIаниги, гьев лъалаан гIорхъолъа араб къарумлъиялъул рахъалъ.
Цо къоялъ пуланав базарганас гIанкIуги босун, чIужуялда абун буго квен хIадур гьабеян. Кваналел рукIаго мискинчияс нуцIида кIутIула ва квен гьарула. Базарганас инкар гьаби гуребги, хъачIго ахIдон, гьев нахъе гъола.
Базарганасул чIужуялъ гьесде гIайиб гьабула, кумек гьабизе бегьулеб букIинчIищиланги абун. Амма жиндирго къарумлъиялъ гьев кантIизавизе кIоларо.
Гьелдаса хадуб заман иналде базарганасул тукен бухIула. Лъадуца сабру гьабеян абуниги, хIалбихьиялде дандечIезе кIвечIого, гьес гьей гIадан нахъе йитIула.
ТIадегIанав Аллагьас гьей махIрумлъараб жо лъикIалдалъун хисула. Гьей росасе уна цогидав чиясе ва гьевги ватула сахаватав, хIеренав, загIипазул ургъел гьабулев, гьарарасе жо кьолев.
Цо къоялъ кваналел рукIаго нуцIида кIутIула. КIалтIа чIун ватула мискинчи. Росас кванил бутIа гьесие кьейин амру гьабула. Ризкъи кьолев Аллагь ﷻ вугин ва кумек тIалаб гьабулев чи нахъчIвазе бегьуларин абула.
Рокъое ячIарай лъадуда магIу кквезе кIоларо. ГIилла цIехедал, гьелъ бицуна дов мискинчи вукIанин жиндир вукIарав росилан. РакIалде щвезабула гьесул къарумлъи ва гьарун вачIарав нахъе витIулаанин абун.
Гьелъухъги гIенеккун, росас абула: «Гьев мискин дур цевесев рос ватани, дун вуго доб мехалъ гьес нахъчIван вукIарав чи», - ян.
Гьадинал мисалал нилъер щивасе рукIине ккола гIумруялъул къагIидаби ракIалде щвезарулеллъун. Гьарарасе бугеб жо кье, сахаватавлъун вукIа ва лъазе ккола Аллагьасул рахIматалъул нуцIби рагьулеллъи цогидазе нуцIа рагьаразе.
