Берцинал рагIаби

Берцинал рагIаби

ШафигI МухIаммад Зугьратица абун буго: «Гьаб заманалда нилъ цIикIкIун хIажатал руго тасаввуфалде. Щайин абуни, нилъер гIолохъаби гьава-шавкъалде гьетIарал руго, ракIаздаги шагьват бергьун буго. Гьеб кинабго гIолилазулъ гIемерлъидал, хутIбачагIазул хутIба, тIахьал хъвай, вагIзачагIазул вагIза, гIалимзабазул хIукму лъугьуна пайда дагьаблъун…», - ин.

Гьединлъидал, нилъее чара гьечIого хIажат буго лъикIлъиялде рачунеб нух. Гьебги букIине ккола гIолохъанаб гIелалда жидерго напсазда кверщел гьабизе кIолеблъун. Кверщел гьабиги букIуна шайихасул ва гьесул муридасул нухалдалъун, щибаб бакIалда шайихасул бакIалда чIолел (лъикIаб-квешаб малъулел, кантIизарулел) чагIи рукIунедухъ.

ХIанафиязул факъигьас, гIалимчияс «Дарул мухтар» абураб тIехьалда хъван буго: «Абу ГIали Дакъакъица бицана: «ТIарикъат дица босана Абул Къасим ан-Насрил Абазиясдаса. Абул Къасимица абуна жинца гьеб босанин имам Шиблиясдаса, гьес босана Сарию СакъатIидаса, гьесги – МагIруфул Курхиясдаса, гьес - Давуду ТIаиясдаса. Давуду ТIаиясги гIелму ва тIарикъат босана Абу-ХIанифадаса. Гьезул щивасги гьелъие къимат кьун рецц гьабуна ва хирияб нух букIиналъе мукIурлъизеги мукIурлъана», - ян.

Имам ШафигIияс абуна: «Дица гьалмагълъи гьабуна суфиязулгун, гьездасан дида лъана лъабго гIакъилаб калимаги:

1. Заман буго хвалчен, дуца гьеб къотIичIони гьелъ мун къотIула.
2. Дуца дурго напс лъикIалде буссинабичIони, гьелъ мун квешалде вуссинавула.
3. (Щиб бугониги жо) гьечIолъи – хвасарлъи буго.

МухIаммадгIариф Къурбанов