Тавбуялъул кIвар
ТIадегIанав Аллагьас ﷻ МухIаммадияб уммат тавбу кьун хира гьабуна. Гьеб ккола нилъее бугеб рахIмат. Цере рукIарал умматазе гьедин букIинчIо. Ккараб мунагьалъе хасаб гIазаб букIана. Гьеб тIубачIого мунагь тIаса кколароан. Нилъер абуни, ккараб мунагьалъухъ гьабураб тавбу Аллагьас ﷻ къабул гьабула. Амма тавбуялъеги руго тIуразе кколел шартIал. Бокьа-бокьарабги гьабун, гьеб тавбуялъ чурулин чIезе бегьуларо.
БетIергьанас мунагьги тавбуги бижана. Гьес нилъ рижана гъалатI кколеллъун ва тавбу гьабизеги малъана. Аллагьасде ﷻ руссунел гIадамал Гьесие рокьула. Къуръаналда БетIергьанас ﷻ абуна: «Аллагьасе тавбу гьабулел гIадамал рокьула», - ян.
Ибну МасгIудица абуна: «Къабулаб тавбу ккола, тавбуги гьабун, мунагьазде руссунгутIи», - ян.
ХIасанул Басрияс абуна: «Къабулаб тавбу ккола рекIелъ пашманлъи букIин, мацIалъ истигъфар гьаби, лугбаз гьабулеб мунагь тей ва гьезде тIадвуссунгутIи», - ян.
Абу ГIали Дакъакъица абуна: «Тавбу ккола муъминзабазул сипат», - ян. ТIадегIанав Аллагьас ﷻ абуна: «Нужеца киназго тавбу гьабе, я муъминзаби», - ян. (Сура «Нур», аят 31)
Ибну ГIатIаица абуна: «Тавбу кIиго батIияб буго. Цо тавбу гьабула гIакъубаялдаса цIунизелъун ва цогидаб тавбу ккола БетIергьанасул сахаватлъиялдаса нечон гьабулеб», - ян.
ГIумар-асхIабас абулаан: Нуж гIодор чIа тавбуялъул гIадамалгун, гьелъ кутакалда пайда кьола», - ян.
Лукъманул ХIакимица васасда абула: «Вореха тавбу нахъе бахъуге, хвел тохлъукьего тIаде щола», - ян.
Бишр ибн ХIарисица бицана Фузайл ибну ГIиязица абунин: «Къад къоялъ гIодун гьабураб тавбуялъ чурула загьириял мунагьал. Къаси гIодун гьабураб тавбуялъ батIиниял мунагьалги чурула», - ян.
Балагьеха тавбуялъул бугеб асар, нилъ гьелде кидаго хIажаталги руго. Гьебги ккола ТIадегIанав Аллагьасул ﷻ нилъее кIудияб рахIмат.
Аллагьас ﷻ нилъ тавбу гьабулездасан гьареги. Кинабго жоялда хIалкIолев цохIо Аллагь ﷻ вуго.
