ЧIухIи ва гIажаиблъи
ЧIухIи ва гIажаиблъи
РекIелъ чIухIи букIин ккола кIудиял мунагьаздасан. Гьеб бугодай яги гьечIодай абун щивав бусурбанчияс жиндирго хIисаб-суал гьабизеги ккола. БацIцIалъичIеб ракI жужахIалъуб бежизе бугелъулха.
Гьединго нилъ чIухIизе бегьуларо гIелму лъанин абун, ай цогидаздаса живго кIодолъун вихьизе. Салафу-салихIуназул цояс абуна:
«ГIелмуялдалъун чIухIарав чи Аллагьас гIодовегIан гьавула, гIелмуялдалъун гIодове виччарав чи ТIадегIанав Аллагьас кIодоги гьавула», - ян.
Вагьбица абуна:
«ТIадегIанав Аллагьас алжан бижидал гьелда абула: мун хIарамаб буго чIухIарав чиясе», - ян.
МухIаммад бин ХIусайн бин ГIалица абуна:
«РекIелъе чIухIи лъугьанщинахъе гьедигIанасеб къадаралъ гьесул гIакълуги мукъсанлъула, цIикIкIун бугони - цIикIкIун, дагьаб бугони – дагь».
Сулайманида гьикъула щиб квешлъиялъин пайда гьабизе толаребилан абун. Гьес абула чIухIиялъ толарин.
ГIабдуллагь ХIададица абуна:
«Мунагьалъул аслу лъабго буго: чIухIи, гьеб ккана иблис къосиналъе сабаблъун.
ХъантIи, гьеб ккана Адам авараг мекъи ккеялъе аслулъун. Гьезие хIарам гьабураб гъотIодаса кваназе рачана хъантIиялъ. ХIасад, Къабилил мунагьалъул аслу гьеб ккана. ХIасад гьабун жиндирго вац чIвана гьес».
ХIатимул Асамица абуна:
«ТIагIаталъул аслу буго лъабго жоялъулъ: Аллагьасда хIинкъиялъулъ, Гьесда хьул лъеялъулъ ва рокьиялъулъ. ГIасилъиялъул аслуги лъабго жоялъулъ: чIухIиялъулъ, хъантIиялъулъ, хIасадалъулъ», - ан
Нилъее чIухIи бегьуларо, щайин абуни гьеб Аллагьасул сипат букIиналъ. Нилъеца ТIадегIанав Аллагьасул сипат кквезеги бегьуларо. ЧIухIиялъул балагьлъун ккола, гьелъ ццим бахъинабулеб букIин. Ццимги квешаб жо буго. Гьелъин аварагас лъабго нухалъ такрар гьабураб, ццим бахъунгеян абун, насихIат гьарун вачIарав чиясе. Живго жиндаго гIажаиблъун лъугьин ккола живго лъикI вихьи, напс кIодо гьаби. Гьеб какараб жо буго. Аллагьас цIунаги нилъ гьединал къабихIал пишабаздаса.
