Мискинав тIабиб
Алгъарат абураб икълималда бетIерлъуда вукIана цо султIан. Гьесие бищун бокьулеб жо меседги букIана. Цо къоялъ жиндирго халкъалда гьес лъазабун буго: «Киналниги султIаназулги султIан вуго дун. Дие багьаги меседалдалъун кьола. Жакъа къоялдаса байбихьун дие бокьун буго дун гьавураб къоялъ гIадамаз дир цIайи халгьабун месед бакIаризе», - ян.
ХIалтIухъабаз гьев гьавураб къоялдехун цIадираби гьаруна. Цояб рахъалда султIан гIодов чIана, цогидаб рахъалда кIудияб хьаг лъуна. Гьев гьавураб къоялъ аза-азар чияс хьагинибе месед рехулаан, гьелъул къадар султIанасул цIайиялда бащалъизегIан. Гьеб заманалда султIанасул цIайи 76 килограмм букIана. Меседил цIайи гьесул цIайиялда бащалъидал, гьес абуна: «Гьале гьанже дун унго-унгоги меседил багьаялда вуго», - ян.
Амма гьев киданиги разиявлъун вукIунароан жиндирго бечелъиялдаса. Къойидаса-къойиде кваналеб квенги цIикIкIинабулаан ва лъагIел сверилалде цIайиги цIикIкIун батулаан. Чанго соналдаса гьесул цIайи 180 килограммалде бахуна. ХIалица гурони вилълъине бажаруларев гьесда рекIел унти ккола. ХIалица гурони хIухьелги цIан бажарулеб букIунаро. Амма квен толеб букIунаро.
Цо къоялъ хвалил кьер чIвала гьесда ва кинав тохтур вачIаниги щибго гьабун бажарулеб букIунаро.
Ахирги гьев вихьизавизе хутIула «мискинав тIабиб» абун тIокIцIар бугев тохтур. ГIадамаз бицунаан бокьараб унтуе дару гьабун бажарулин гьесухъайилан абун. Цинги султIанасухъе вачун вачIарав гьев мискинав тIабибас абула:
- Сах гьавуни щиб кьезе хIадурав вугев мун?» - илан.
- Дир бугебщинаб месед кьезе хIадурав вуго, - ян абула султIанас.
Сахлъизе бокьун батани дица малъараб гьабизе кколаянги абун, тIабибас бицуна гьадин: «Пуланаб магIарда буго ицц. Гьениса лъим гьекъедал мадарги ккола. Амма гьенире ине ккола цадахъ щибго жоги босичIого», - ян.
- Дир чугIаги бачине бегьуларищ цадахъ? - илан гьикъула султIанас.
- Чуги бачине бегьуларо, пакъиргIадин ретIа-къанги рилълъине ккола. Гьеб бакI цIакъ рикIкIад букIиналъ, нухда гIезегIан мех базе буго. Гьел шартIал цIуничIони, сахлъизеги гьечIо, - ян абула тIабибас.
Мискинас малъухъе кинабгоги гьабун сапаралде рахъуна. Нухда гьез бала чанго моцI. Вакъидал гIадамазда гьарулаан квен. Гьезги цIакъго дагьаб къадар гурони кьолароан. МагIарде рахиналде султIанас 50-ялдасаги цIикIкIун килограмм тIаса рехула. Цинги иццухъе щведал, гьениса лъимги гьекъон, дагьабго заманги гьениб бан, жиндирго къавмалъухъе тIадвуссуна. Алгъараталде щведал гьесул цIайиги букIараб хIалалде, ай 76 килограммалде ккола.
ВатIаналде щведал султIанас мискинав тIабибасе гIемераб месед кьола ва амма гьес къабул гьабуларо. Кинабго месед мискин-пакъиразе бикьеян абула гьес.
Ахиралдаги тIабибас бицуна: «Унго-унгоги нилъеца лъим гьекъолеб букIараб бакI буго гIадатияб мугIрузул ицц. Мун сахлъиялъе сабаблъунин абуни ккана гIемер вилълъанхъи ва дагь кванай», - ян абун.
