Инсан жаниса къачiалеб
Гьабураб лъикIаб гIамалалъухъ Аллагьас ﷻ кири хъвала. Жиб гьабулелъул ният бугони гIицIаб Аллагьасе ﷻ гIоло абун, Гьесул ﷻ разилъи щвеялъул мурадалда гьабулеб. Гьеб гIамаллъунги букIине бегьула квералъ гьабулелда релълъун, кIалъалъ бачунеб зикру, аварагасде ﷺ битIулеб салават, гьабулеб истигъфар-тавбу гIадаб.
Аварагасул ﷺ хIадисаздаса ва имамзабаз тIахьазда хъваралдаса нилъеда лъала гьединал гIамалал гьарулелъул жидеца щвараб ажру хвезабулел жал напсалъулъ ракки. Жалги чIухIи, живго жиндасаго разилъи, рихьдае гIоло гIамал гьаби гIадал какарал хасиятал, жидедаса вацIцIалъизе чиясеги захIмалъулел. Гьездаса рахъун ккезе бищун лъикIаб ва бигьаяб буго гьабулеб гIамал малъулев чиясдаса босун гьаби. Гьев чиги вуго тIарикъаталъул устар. Устарас кьун гьабулеб тIадкъай букIуна чиясе гIумрудул нухда нурлъун, рекIелъа шайтIан нахъе хъамулеблъун ва тIадехун рехсарал какарал хасияталги чорхолъа рахъизе кумек гьабулеблъун. Гьелда тасаввуф гIелмуйинги абула.
ТIарикъаталъул устарас кьун гьабураб гIамалалъул хIакъалъулъ имам Гъазалияс абун буго: «Тасаввуфалъул нухде лъугьин щивасда тIадаб буго. Щайин абуни, аварагзаби хутIун цонигияв напсалъулъ гIунгутIабаздаса ва рухIиял унтабаздаса цIунаравлъун гьечIо», - ян.
Гьесго абун буго: «Тасаввуф гIелмуялъул мурад буго гIамал-хасият кинабниги квешаб, какараб тIабигIаталдаса бацIцIад гьаби. РакIги, кидаго Аллагь ﷻ рехсон, Гьесул ﷻ пикруялда чIезабиялдалъун, Гьев ﷻ тун цогиялдаса гIицI гьаби», - абун. ТIасаввуф гIелму ккураллъун рукIана киналниги Агьлу-сунна-вал-ЖамагIаталъул чIахIиял гIалимзабиги, хIатта имам ШафигIи, имам Малик, имам АхIмад, имам АбухIанифа гIадал мазгьабазул бутIрулги рукIана тIарикъаталъул устарасул нухмалъиялда ва тарбиялда гъоркь.
Жиндир заманалъул кIудияв гIалим ибну ХIажар гIадал чIахIиял факъигьзабазул мугIалим, «Ал-Азгьар» университеталъул ректорлъун вукIарав шайих Закариял Ансарияс абун буго: «Тасаввуф буго напс бацIцIад гьабулеб, гIамал-тIабигIат берцин гьабулеб, исламияб диналъул загьириялги батIиниялги тIадкъаял камил гьабулеб гIелму», - ян. Жунайдул Багъдадияс абуна: «Тасаввуф буго лъикIал тIабигIатазда нахърилълъин ва какараздаса рахъун ккей», - ян. Аллагьас ﷻ насиб гьабеги щивасе тIарикъаталъул устарзабазулгун бухьен ва ахираталда гьезул кумекгун шапагIат! Амин!
МУХIАММАДГIАРИФ КЪУРБАНОВ
