ГIинго тIамуларо
ГIинго тIамуларо
«Дир лъимералъ дица абулеб жоялъухъ гIинго тIамуларо». «ЧанцIулго абураб мехалъ яги ахIдедал гурони дир вас ялъуни яс, жиндирго хIай, телефон тун, дихъ гIенеккуларо». Гьазда релълъарал гIарзал гIемер рагIула. ГIемерисел улбул хьул къотIун хутIула. Щибха гьединаб мехалъ гьабизе бегьулеб? Щайха лъималаз абураб жоялде кIвар кьолареб? Щай гьезда нилъ рагIуларел? Нилъеда ккола, лъималазул гIадалнах чIахIиязулго гIадин хIалтIулин. Амма гьеб гьедин гьечIо. Лъимадул бичIчIиялъул даражаялде рещтIине ккола.
Масала, лъимер буго жиндирго хIаязде машгъуллъун. Гьеб заманалда чIахIиязул цояз гьелда щибниги жо гьабеян абуна. Нилъеда ккола, кIудияв чияс гIадин, лъимералъ, кинабгоги рехун тун, гьебсагIат доб жо гьабизе кколин. Жиндиего бокьулеб иш гьабулеб бугеб лъимерин абуни, цо жо рагIаниги, расанкIабазде (телефоналде, мультиказде) машгъуллъиялъ гьелде кIварги кьечIого чIола. ЧIахIиязда ккола лъимер ургъунго кIалъалеб гьечIин, квешезего чIолеб бугин. Амма хIакъикъаталда гьеб буго гIадалнахул хIалтIи, нилъеца абухъе, гьезул психика батIияб хIалалъ хIалтIула. АхIдон, ццидахун лъимер жидедего буссинабиялде рортула гIемерисел. Амма гьелъ я лъимадуе, я чIахIиязе зарал гуреб гьабуларо.
Гьеб масъалаялъул буго гьадинаб хIукму: лъимералда цо жо абулаго циндаго мухIкан гьабе, гьелда нуж рагIун ругищали. АскIоре ун, бадире балагьун, цин нужехъго лъимер балагьун бугищали халгьабе. Яги гьелда квер хъван, лъимадул кверал ккун, нужедего кIвар буссинабе. Цинги абе, малъе бокьараб жо. Гьеб мехалъ мухIканго гьитIичидаги бичIчIула нужее къваригIараб, нужгоги ццидал цIадулъе ккечIого хутIула. Жеги бегьула лъимералда гьаризе, нужеца малъараб жо такрар гьабейин. Гьедин мухIканлъула гьелда малъараб битIун бичIчIи ва жеги жинцаго жиндиего гьеб тIубазе буюрухъ кьураб кинниги хIукму къотIула гIадалнахалъ.
Лъималаздехун нух бахъизе кIвахIаллъизе бегьуларо. КIвар кьечIого тун, квеш кIалъан, психика хвезабизе бегьуларо. Къиямасеб къоялъ гьеб лъимер дуда кIалгьикъизе бачIине букIин кIочонге. КIвараб жигар бахъе Аллагьасул диналда рекъон, аманат тIубан, гьитIинаб гIел куцазе.
Гьаб буго лъимал ричIчIиялде нилъ гIагарлъиялъе цо къагIида, нилъер нухлул цо гали. Хадусел номеразда нилъеца цадахъ иргадулал галабиги тIамила, ин шаа Ллагь.
