Эбелалъги бегьула цIализе
Щиб бугониги байбихьулеб жо берцинго къачIазе, гьабизе бокьула киназего. Амма цIияб рухI дунялалде бачIиналде данде бащалъулеб жо лъилго букIунаро. Лъимадул гIумруялда баракат лъола, Аварагасул ﷺ суннатал тIурани.
Лъимер гьабидал суннатаб буго гьелъул кваранаб гIинзунибе как ахIизе ва квегIалъубе къамат цIализе. Нагагь гьеб бажарулев чи аскIов ватичIони, эбелалъ жинцаго гьабизеги бегьула. ТIоцебе рагIараб жо – Аллагьасул цIар букIина лъимадул. Жеги суннатлъула кваранаб гIинзунибе «Ал-ГIимран» сураялъул 36 аят ва сура «Ихлас» цIализе. Гьедин гьабула, лъимер щайтIаналдаса цIунараблъун букIине. ТахIник гьабизеги лъикIаб буго. Гьеб ккола чIамун тамах гьабураб чамасдак лъимадул дабазда лъулъай. Гьеб чIамизе рекъараб буго аскIор ругезул бищун варагI бугес, тIоцебе лъимадул кIалдибе ккараб жо чамасдакгун гьеб чIамарасул хIацIу кколелъул, гьесдаса баракат щвезе. ТахIник гьабиялъ лъимадул кIалзул ччорбал щула гьарула, хадуб гьелъие хахдезе бигьалъула. Чамасдак кодобе щвечIони, цогидаб гьуинаб, амма жинда цIа хъвачIеб жоялдалъун гьабила, масала, кишмишалдалъун.
Лъимер гьабун анкьабилеб къоялъ суннатлъула гIакъикъ хъвезе, берцинаб, магIна бугеб цIар кьезе (анкьабилеб къоялъ гIакъикъ хъвезе ракIалда батичIони, гьабураб къоялъго кьела цIар). Гьединго бетIерги кIкIван, расул цIайиялда бащадаб месед яги гIарац садакъаде бикьила.
