Алжаналда рукIунел хIурулгIинзаби
Руччабазул гӀемер гьикъулеб суал буго Алжаналда рукIунел хIурулгIинзабазул хӀа-къалъулъ. ГӀемерисезе бокьуларо росас цоги лъади ячине, ахираталда гьесие щвезе рес бугей хIурулгIин гьей ятанигицин. Кинниги Аллагь гIадилав вуго.
РитӀухъаб гӀумру гьабурал, БетIергьан разияб хIалалъ хьвадарал бусурбанал руччаби, Алжаналде лъугьине ихтияр щведал, гьел рукIине руго бищун гьайбатаб, бицине хIалкIолареб гIажаибаб сипаталда. Алжаналдаго рижарал, щибго дунялалъул къварилъи-захIмалъи ва гIибадаталъул таклиф бихьичIел хIурул-гIинзаби бусурбабазул руччабазда кигIан гьитӀинаб къадаралъги дандекквезецин рес гьечIо. Аллагьасе мукIурай гIадан даражаялъул рахъалъги гIемерго тӀадегӀанлъиялда йикӀине йиго.
Алжан ккола щибго квешаб, рокьукъаб, рахIат хвезабулеб жо гьечӀеб бакӀ. Гьенире лъугьуна гӀицӀго квешал пикрабаздаса рухӀал рацӀцӀад гьарурал чагӀи. ЧIужугIаданалъеги гьениб щибго квалквал, ургъел букIине гьечIо, росасе хIурулгIинзаби щваниги. Гьелги Аллагьасул рахъалъан ругел кири-сайгъатал кколелъул.
Ахираталъул пикру гьабулеб мехалъ бусурбабаз жидеего кьезе кколеб аслияб суал буго Алжаналъул ахазда гьоркьоб абадияб гӀумруялъе кин мустахӀикълъизе кIолебин, абадияб талихӀалъул ва разилъиялъул гӀумру гьабизе мустахӀикъавлъун кин лъугьине рес бугебин абураб. Ургъел гьабуге, Алжаналъуре щведал хутIараб жо Аллагьас бищун лъикӀаб куцалда рекъезабила, ин шаа Ллагь.
