Ахираталда бищунго халатав
Ахираталда бищунго халатав
Как ахIиялъул бугеб хиралъи гIадамазда лъалеб букIарабани, гьез гьеб хвалчабаз яги можоро тIамун бахъилаан. Как ахIиялъул гьаракь рагIаралщинал гIадамазги, жиназги, гъутIбузги, ганчIазги Къиямасеб къоялъ как ахIарав чиясе нугIлъи гьабула.
Будунасул как ахIи рагIанщинаб жоялъ гьесул мунагьал чурагиян дугIаги гьабула, гьесул как ахIиялъе кинабго жоялъ жавабги гьабула, гьесда цадахъ как баразе щвараб гIадаб кириги гьесие щола. Как ахIулеб мехалъ шайтIан лъутула. Будунзаби Къиямасеб къоялъ бищун рорхатал гIадамаллъун рукIине руго. Гьел хабалъаги рахъуна как ахIулаго, Аллагьасе бищун рокьулездасанги гьел ккола. Щуябго как ахIулел чагIи Къиямасеб къоялъ мискалъул гохIазда тIад рукIуна. Къиямасеб къоялъ гьезие хIинкъиги букIунаро, гьел цIаялдасаги цIунула, Алжаналдеги лъугьуна, гьезие шагьидасул кириги щола.
Как ахIараб росу гьеб къоялъ гIаммаб балагьалдаса цIунула.
12 соналъ как ахIарав чиясе Алжан хIакълъула, щибаб къойил гьесие 60 лъикIлъиги хъвала. ГIалахалда какги ахIун как бани, гьесда хадур гIемерал малаикзабазги как бала.
Как ахIиялъул шартIал
Как ахIиялъул шартIал ккола, как ахIулев чи бусурманав, гIакъилав, бихьинав вукIин, какил рагIабиги рачIараб тартибалда аби, тIатIалаго ахIиги, жамагIаталъе ахIулеб бугони, жамагIаталъул цониги чиясда гьеб рагIуледухъ ахIи.
