ХIажиев МухIаммад ракIалде щвезавуна
Щибаб росулъ вукIуна жиндаса халкъалъе пайда бугев чи. Масала, гьединавлъун вукIана хIабшадерие ХIажиев МухIаммад.
БАЯН
ХIажиев МухIаммад гьавуна 1922 соналъ. Гьев вукIана экономикиял гIелмабазул кандидат. ГIахьаллъи гьабуна КIудияб ВатIанияб рагъда ва гьев вукIана танкабазул ротаялъул командирлъун. Гьев мустахIикълъана «За отвагу» абураб шапакъаталъе ва гIемерал медалазе.
1948-1949 соназда хIалтIана ГIахьвахъ районалда партиялъул тIоцевесев ва кIиабилев секретарлъун. 1968 соналда цIунана экономикиял гIелмабазул кандидатлъи.
1969-1970 соназ Кизилюрт районалъул Сулакалда бугеб ДАССР-алъул директорлъун хIалтIана. Ракь багъарун хадуб ЦIобокь Миякьо росу баялъе тIоцебе кьучги лъуна. Росдал колхозалъе нухмалъи гьабулеб заманалда, жиндирго харжалъухъ бачана росулъе ток, рагьана участковияб больница, бана росдае хIамам, чIана пихъил ахал. Гьел ва цогидалги хIалтIаби гьарурав чи хIисабалда жакъаги цIакъ хIурматалда рехсола хIабшадерица гьесул цIар.
Дагьал церегIан къоязда гьев ракIалде щвезавиялъул мурадалда ХIабши росулъ тIобитIана мажлис. Гьениб бицана гьесул ва гьес гьарурал лъикIал ишазул хIакъалъулъ.
ВагIза-насихIат гьабун кIалъазе рахъана росдал имам Шамил-хIажияв, Валиев Эмендада, росулъ СагIид-афандиясул цIаралда бугеб мажгиталъул имам ГIарип, бергьарав махшалил хирург ХIажиев Шагьрудин, Арихкент росдал имам ГIабдуллагь Казиев. Мажлисалъе нухмалъи гьабуна ГIалиев Багьавудин-хIажияс.
КIалъазе вахъарав МухIаммадил вас Шагьрудиница кIудияб баркала загьир гьабуна мажлисалда гIахьаллъаразе ва росдал жамагIаталъул рухIияб рахъ цебетIезабун лъебералда хадуб соналъ дибирлъи гьабурав Багьавудин-хIажиясе. Аллагьас къабул гьабеги щивалул гIамал.
