МацI цIуни
МацI цIуни
Аби буго, мацI бугин ракьа гьечIеб жойин абураб. Гьединлъидал, мацI цIунизе ккола къваригIел гьечIел харбаздаса.
МацIалъ инсанасе кIудияб зарал гьабула, амма нилъеда гьеб битIун хIалтIизабизе лъани, гьелъулъ буго хвасарлъиги.
Нилъеда лъала загьру щиб жо кколебали. Гьеле гьединабго загьру буго мацI мекъи хIалтIизабиялда жанибги. Гьединлъидал Къуръан-хIадисалъги бицунеб буго нилъеда, тIарикъаталъул машаихзабазги малъула мацI къваригIел гьечIеб харбидаса цIунизе кколеблъи.
Аварагасул ﷺ хIадисалда буго: «Лагъ битIараб нухде тIовитIуларо гьес жиндирго ракI битIараб нухде тIобитIизабичIони, ай ракI цIуничIони квешабщиналдаса. Гьесул ракIги хIакъаб, битIараб нухда цIунун букIунаро, гьес жиндирго мацI квешабщинаб жоялдаса цIунун гьечIони, гьев чиги Алжаналде лъугьунаро жиндирго мацIалдалъун мадугьаласе букIа, инсанасе букIа зулму-зарал гьабун батани», - ян абураб.
МугIаз бин Жабал-асхIабас бицун буго, цо къоялъ жинца Аварагасда ﷺ гьикъанила, жидеца бицараб хабар Къиямасеб къоялъ цIадирабазда лъун цIалищин абураб. «ЦIала, МугIаз, инсанас гъибат-бугьтанги, чияе зулму-заралги гьабулеб бугони, гьеб цIадирабазда цIачIого ва хIисаб босичIого толаро», - ян.
Гьалдалъун нилъеда бичIчIула, черхалъ гьабураб гIечIого, кIал-мацIалъ гьабуралъухъги къисас Аллагьас босулеблъи.
Сайид бин Жабир-асхIабас бицун буго, хирияв Аварагас ﷺ абунин: «Адамил лъимер макьидаса борчIидал, лугбаз мацIалда абула, мун Аллагьасукьа хIинкъа жидее гIоло, мун ритIухъго бугони, нижги ритIухълъиялда рукIуна, дуца квешлъи гьабуни, нижги квешаллъун рукIуна… Дуда лъай, мун сабаблъун тIубараб соналъ Аллагьасда цебе жаваб кьезе кколеблъи…». (Тирмизи)
Гьединлъидал, нилъеца нилъго цIунизе ккола кIал-мацIалдаса, чорокаб, къабихIаб гIамалалдаса, гIадамазе зарал гьабиялдаса ва гъибат-бугьтаналдаса.
Аллагьас ритIун ккезареги.
