Зулму гьаби
Жакъа зулму гьаби гIадатияб жолъун лъугьун буго. Исламалдайин абуни зулму гьаби гьукъун буго. Къуръаналдаги рехсон буго зулму гьабулел чагIазе кутакаб тамихI букIине бугин абун.
Аллагьас ﷻ Къуръаналда абулеб буго (магIна): «Дуда ракIалде ккоге, МухIаммад, Аллагь ﷻ гъапуллъун вугин абун гьел зулмучагIаз гьабулеб гIамалалдаса. Аллагьас ﷻ гьел гIазаб гьабичIого тола, гьезул берал гIачIихунеб къоялъ гIазаб гьабизе», - ян. (Сура «Ибрагьим», аят 42)
Ракьандаса кверал къотIарав цо чи вихьун вуго пашманго гIодов чIун. РакI бакъван гьев вихьидал, щиб ккарабин гьикъидал, гьес бицун буго: «Цо къоялъ дица зулму гьабун ччугIихъанасухъа ччугIа бахъана. Хадусеб къоялъ килщида бугеб унтиялъ радал ворчIана дун. Гьеб унти къокъаб заманалда кIигъуждузда щвана ва кIиябго квер къотIизе ккана. Цинги дица цIаларав чиясда цIехейдал гьес бицана доб ччугIихъанасда гьабураб зулмудул ва гьес хьамуралъул хIасил бугин гьебилан. Гьесухъа тIасалъугьин тIалаб гьабичIони мун кватIичIого хвезе вугиланги абуна гьес.
Сардилъ гьев ччугIихъанги валагьун, тIасалъугьин гьарун, гьесул хIатIазда убачал гьаруна дица. Гьев дида тIаса лъугьана. Цинги дица гьикъана гьесда щиб дуца гьабураб гьаб унти диде ккезе ккани абун. Гьес абуна: «Дуца дида зулму гьабидал, зодире квералги ритIун, квешаб дугIа гьабуна дуе», - ян.
Ибну МасгIудидасан бицараб хIадисалда буго: «Цонигиязе зулму гьабуге, гьабуни нужеца гьабураб дугIаялъе Аллагьас жаваб гьабизе гьечIо, нужеца цIад гьаризе буго ва гьеб базеги гьечIо, кумек гьаридалги нужее кумек гьабизе гьечIо», - ян.
Гьединго жинда зулму гьабурасул дугIаялдаса цIунизе ккола. Гьесул дугIаялдаги Аллагьасдаги ﷻ гьоркьоб пардав букIунаро. Хирияв Аварагас ﷺ абуна: «Жинда зулму гьабурасул дугIаялдаса хIинкъа, гьелдаги Аллагьасдаги ﷻ гьоркьоб щибго пардав букIунаро», - ян. (Бухари)
Гьеб цебе рехсараб хIадисалъул баян гьабун ГIабдуррауф Мунавияс хъвалеб буго: «Жинда зулму гьабурас нужее квешаб дугIа гьабичIого букIине нуж зулмуялдаса рикIкIалъе. Гьев капурав ялъуни фасикъав вугониги гьесул дугIаялъе жаваб гьабула ва амма гьесул къосин гьесда цадахъ хутIула», - ян.
Жабир Мажидов
