ГIаврат бахчи
ГIаврат ккола инсанасул черхалдасан жиб цебе баккизе ва бихьизе бегьулареб, рес бугев чияс бахчизеги тIалъулеб бакI. ГIаврат бахчизе рес гьечIев чияс, ай щибго гьечIев толохIочго рала паризаялги суннаталги какал. Гьедин бараб какги бецIизе тIалъуларо, ретIел щваниги.
Бихьинчиясул какилъ цебе баккизе бегьулареб ва как базегIан цебе мухIканго бахчизе тIалъулеб гIаврат ккола цIинуялдаги накуялдаги гьоркьоб бугеб бакI. Жибго цIину ва наку гIавраталдасан кколаро, кинниги гIаврат мухIканго бахчаравлъун вукIине гьелги рахчила.
Узденай гIаданалъул какилъ бахчизе тIалъулеб гIаврат ккола, гьумерги кIиябго кверги хутIизегIан, кинабго черх. Как балев чиясул ва чIужугIаданалъул гIаврат бугин абун бицараб бакIалдаса гьитIинабниги бакI баккун батани, гьелъ как биххизабула.
Гьороца ретIел борхун цебе баккараб гIавраталдасан бакI гьес хехго бахчани, как холаро, как балаго тIаде бачIараб бакъвараб хъублъи хехгьабун тIаса инабураб мехалда холаребго гIадин.
Какилъ бахчизе тIалъулеб гIавраталъул цо дагьабго бакIалъе гIолеб жо гурони гIаврат бахчизе жо батичIони, гьеб гIурабгIанасеб бакI бахчизе тIалъула. Бахчулеб мехалъ цебесебги нахъисебги гIаврат цин цебе ккезабила. Цоялъе гурони гIолеб гьечIони, цебесеб гIаврат бахчила ва рукугI-суждагун, киналго арканал тIуразарун, какги бала.
Какилъ гIаврат бахчулеб жоялъе шартIлъула жинца тIомалъул кьер бахчулеб букIин. ГIаврат бахчизеги тIалъула тIасанги хьибилалдасанги. Гъоркьан тIадехун бихьулеб бугони, зарал гьечIо.
Гурдеялъул габур гIатIидаб бугони, рукугIалде къулараб мехалъ гIаврат бихьуледухъ бугони, как хвезабула. Гьеб буго хасго риидал майкагIадал жал ретIараз цIодорго пикру гьабизе ккараб бакI.
Нилъер гьанир ретIел ретIарал бихьинал мекъи кколел ва какал хвезарулеб жолъун ккола, тIасан халатаб ретIараб жо гьечIого, къокъаб гурдеги ретIун, как бай. РукугI-суждаялде индал цIинуялдасан гъоркьехун бугеб мугъзаданахъаса бакI баккула ва гьелдалъун какги хола. Гьеб гъалатI гIемер ккезеги ккола. ЦIодорлъи ва мухIканлъи гьабе.
