Бищун лъикIаб уммат
Бищун лъикIаб уммат
Щивав бусурманчиясул кIудияб талихI буго, Къуръаналъ бищун лъикIабин нугIлъи гьабураб, свалат-салам лъеяв МухIаммад аварагасул умматалдаса рати. Гьеб нигIматалъухъ шукру гьабизе тIадаб буго нилъеда.
ТIадегIанав Аллагьас ﷻ абулеб буго: «Нуж руго бищун лъикIаб уммат, лъикIалдалъун амруги гьабулел, квешалдаса гIадамалги нахъчIвалел», - ан. Жинда Аллагь разилъаяв ГIумар-асхIабас хIежалда хутIба гьабулаго, цебе рехсараб аятги цIалун, абуна: «Щив чи вугониги хирияв Аварагасул умматалдаса вукIине бокьун, Аллагьас Къуръаналда абухъе, лъикIалдалъун амруги гьабе, квешалдаса гIадамалги нахъчIвай», - ан.
МухIамад аварагасул ﷺ уммат бищун хирияб букIиналъе нугIлъи гьабула хадуб рехсараб хIадисалъги: «Аллагьас дие кьуна цогидал аварагзабазе кьечIеб чанго жо», - ян. Цинги асхIабзабаз абуна: «Гьел щал кколел, я Аллагьасул расул?» - ан. Свалат-салам лъеяв Аварагас жаваб гьабуна: «Аллагьас дие квербакъула рикIкIадасанго, тушбабазул рекIелъе хIинкъи рехиялдалъун; дие кьуралгIан гIемер ракьалъул бергьенлъаби, цогидал аварагзабазе кьечIо; дида цIар АхIмадин тана; кинабниги ракь дие гIибадаталъе бацIцIадаблъун гьабуна; дир уммат бищун хирияблъунги гьабуна», - ян.
Абу-Гьурайратица бицараб риваяталда буго: «ТIадегIанав Аллагьас дие кьуна, цогидал аварагзабазе кьечIеб щуго жо: дун авараглъун витIана киналниги гIадамазухъе; кинабниги ракь дие мажгитлъун гьабуна; дие моцIил нухлул манзилалда, тушманасда тIад квербакъула, гьезул рекIелъе хIинкъи рехиялдалъун; гъазаваталдаса щвараб гъанима дие хIалалаблъун гьабуна; БетIергьанас дие шафагIаталъе изну кьуна, дица гьеб умматалъе, къиямасеб къоялде нахъе цIунана», - ян.
Къиямасеб къоялъ хирияв Аварагас ﷺ жиндирго уммат батIа гьабизе буго гьезул гьурмазда бугеб гвангъараб нуралдалъун.
Имам АхIмадица бицараб хIадисалда абулеб буго: «Къиямасеб къоялъ дица цогидал умматаздаса дирго уммат батIа гьабула, гьезул гIамал хъвараб тIехь кваранаб рахъалдасан кьеялдалъун ва суждаялъул асаралъ, гьезул гьурмаздаги квераздаги бугеб нуралдалъун», - ян.
Адам аварагас абуна: «ТIадегIанав Аллагьас МухIаммадил умматалъе кьуна, дие кьечIеб ункъго хиралъи:
- Дир тавбу къабул гьаби Маккаялда букIана, МухIаммадил умматалъ бокьараб бакIалда тавбу гьабула, Аллагьас гьезул тавбуги къабул гьабула.
- Аллагьасе гIасилъидал, дун дирго лъади ХIавадаса ватIа гьавуна, МухIаммадил уммат Аллагьасде гIасилъула, гьел жидерго руччабаздаса ратIа гьаруларо.
- Дида тIад ретIел букIана, Аллагьасе гIасилъидал дун ратIлида гIицIцIавлъун лъугьана. МухIаммадил уммат гIасилъула, гьел ратIлида гIицIцIаллъун лъугьунаро.
- Дир гъалатI ккана Алжаналъуб, БетIергьанас дун гьениса къватIиве вачахъана. МухIаммадил умматалъул гъалатIал ккола, амма Аллагьас гьел тавбуялдалъун Алжаналде рачуна».
АхIмад МухIумаев
