Пайдабазул гъамас
Пайдабазул гъамас
Ражипер гIемерисез кванилъ хIалтIизабула. Гьеб рекъезабун хIалтIизабизеги лъикIаб буго. Гьелъулъ буго бихьинчиясул черхалъе асар гьабулел гIемерал жал. Гьединго гьелъулъ буго лъималазул рижи лъикIлъизабулеб фолот абураб гIуцIиги. Лъимер гьабизе ругел руччабазеги лъикIаб буго гьеб кваназе. Гьеб заманалда руччабазул би лъамаги гьабулеб буго ражипералъ.
Гриппалде ялъуни квачалъул унтуде дандеги гьеб лъикIаблъун рикIкIуна. Иммунитетги гьелъ лъикIлъизабула. РекIелгун бидурихьазул гIуцIи сах гьабизеги кумек гьабула.
Кумек гьабулеб буго тIулал клеткаби рукIалиде рачIинаризе, ццидал къвачIаялда ганчIал лъугьине тунгутIизе.
КIващул гIуцIиялъул нухазда воспалительниял процессал лъугьинеги толел гьечIо.
ГьоцIогун жубан хIалтIизабиялъ бидулъ холестериналъул къадар гIодобе ккезабула. Бидурихьазда лъугьараб кьаралъи биххизабула. ГIадалнахулъ тромб ккеялъул хIинкъи дагьлъизабула. Би хьвади лъикIлъизабун, бидурихьал эркенго хIалтIуледухъ гьел гIатIилъизе гьарула.
ЛъикIаблъун бихьизабулеб буго гьоцIогун жубан хIалтIизабизе бронхиалияб астма, гипертония сах гьабизе, ракIалда жо чIунгутIи инабизе, нерваби гIодоре руссинаризе. ГьоцIогун жубан хIалтIизабиялъ кумек гьабула тIомол кьер лъикIлъизабизе, перхот дагьлъизабизе, рас лъикI бижизе.
Рахьгун жубан хIалтIизабиялъ кумек гьабула ццунтрул инаризе, ангинаби сах гьаризе, ухIуди инабизе, макьил низам рукIалиде ккезабизе.
Квен бихIинабизеги кумек гьабула ражипералъ. Рак унтиялдасаги цIунула гьелъ.
ГIемерал пайдаби ругониги циндаго гIемераб къадар хIалтIизабизеги лъикIаб гьечIо. ГIемер хIалтIизабуни, давление бахине ва цIерхIей лъугьине рес буго.
ЛъикIаблъун бихьизабулеб гьечIо кванирукъалда ва бакьазда унтаби ругезе. Лъимер хахизабулей чIужугIаданалъги бегьи-бегьунгутIи лъазабун гурони кванаге.
Аллагьас ﷻ дарулъун гьабеги!
