Авараг ﷺ гьавураб моцI
Авараг ﷺ гьавураб моцI
ХIурматиял бусурбаби, гьале тIаде щвана жинда жанив хирияв МухIаммад авараг ﷺ гьавураб рабигIул аввал моцI. Дагъистаналда гьеб моцIалъ тIоритIула рахъ-рахъалда мавлидал. Щибаб росулъ, щибаб районалда, шагьаразда, рокъо-рокъоб, къватIазда. ХIасил гьабун абуни, тIубараб моцIалъго данделъаби гьарула. Гьебги буго Бичасул Аварагасдехун ﷺ бугеб рокьи загьир гьабун гIуцIулеб тадбир.
Гьале исана цIигьарун руго ГIиса аварагасул цIаралда бугеб РухIияб централда гьарулел мажлисалги. Гьезие бихьизабун буго хасаб сияхIги, щибаб район ва жамагIатал данделъизе рукIине. Гьенире мавлидалде ине хIаракат бахъизе рекъараб буго щивав чиясе.
Пикру гьабеха, бусурбаби, гIумруялда жаниб нилъеца гьарула батIи-батIиял сапарал. ГIемерисел гьелги рукIуна дунялалъул боцIи балагьун гьарулел. Гьезда гьоркьор цIакъ дагь рукIуна диналда хурхараб мурад бугел сапарал. Балагьеха, рачун хъизан-лъималгун мавлидалде къватIиве вахъиналдалъун чиясул тIокIаб батIияб мурад кинаб букIинеб Бичасул Аварагасухъе ﷺ гьоболлъухъ ин, гьев кIодо гьавиялъул къасд гурони. Гьединаб нияталда гьабулеб сапар нилъер гIумруялда жаниб гIемерги букIунаро. Заманги цIакъ хехго бекерулеб бугелъулха.
ГIарабазул улкабазда, Бичасул Авараг ﷺ дунялалде вачIараб заманалдаса бахъараб, гьесул гIумруялъул бицунаан, хIатта кIиго чи данделъараб бакIалдагицин. Балагьеха, гьаб заманалда гIадамал данделъарал бакIазда сундул бицунебали. Дунялалъул боцIул, политика ва хутIараб калам - гъибат-бугьтаналда тIад уна.
Нилъееги лъикIаб букIинародай гIадатлъун гьабуни, бокьараб данде ракIариялда Бичасул Аварагасул ﷺ, асхIабзабазул, табигIиназул ва машаихзабазул хIакъалъулъ къисаби ва хабар бицин. КидаллъизегIан нилъ рукIинел мунагьал гьарулеллъун? Гьабгощинаб гьабураб гIибадаталъул баракатгIаги щвезе ккеларищ.
Хасго гьаб рабигIул аввал моцIалда жаниб бицунеб хабарго хирияв Аварагасул ﷺ хIакъалъулъ букIине хIаракат бахъизе ккела. Бицун гурони Бичасул Авараг ﷺ лъазе ресги гьечIелъул. Вокьизе ккани, лъазеги кколелъулха. Лъаларев чи кин вокьулев? Гьединлъидал, Аварагасул ﷺ хIакъалъулъ лъара-лъараб жо бицунел ругони, рокьиги цIикIкIинехъин буго.
Аллагьас ﷻ кумек гьабеги.
