Баракаталъе сабабал
Баракаталъе сабабал
Бусурманчиясул гIумруялда жаниб сундулъго цебетIей букIуна баракат бугони. Къоялда жанир тIуразе рукIаралщинал ишал гьарун бажарула, заманалъулъ баракат бугони. Щибха гьабизе кколеб, Аллагьас гьелда баракат лъезе ккани?
– Бисмиллагьалдалъун къо байбихьи. Аварагас ﷺ абуна ﷺ: «Бокьараб иш-калам, жиб бисмиллагьалдалъун байбихьичIеб, камилаб букIунаро» (Ахмад). Гьединлъидал, радал рорчIидалги щибаб ишалъул авалалдаги бахъила бисмиллагьи ррахIмани ррахIим.
– Хехго тIаде рахъин ва рогьалил как заманалда бай. Аллагьасул Расулас ﷺ гьадинаб дугIа гьабуна: «Я Аллагь, дир умматалда баракат лъе радал цудунго заманалъулъ» (Тирмизи). Гьелдалъун ризкъиялъулъги лъола баракат.
– Рада-радал Къуръан цIали. Рогьалил какда хадуб цIалани, жеги лъикIаб буго. Аллагьасул Каламалдасан байбихьараб къо баракаталъул цIураб букIина.
– Вирдал рабитIа заманалда тIуразари. Аллагьасул рокьулел авлияалгун бухьараб ракI, жеги зикруялдалъунги чIаголъи щвараб, къоялъ сагIат гIадин хIалтIила, кIвахI бечIай нахъе рехун.
– Гьабулеб иш какалда сверухъ гIуцIе. Ай, ишазда гьоркьоб баккараб заманалъ как бан гуреб, как заманалда бай. Заманалда как бай букIа хIисабалде босун, хутIарал ишал гьезда гьоркьор рекъезаре.
– ХIарамаб рехун тей, тавбу гьаби. Аллагьасул ццин бахъинабулеб, мунагьлъун кколеб щиналъ баракат инабула.
– Аллагьасде ﷻ таваккал тIами ва дугIа гьаби. Тавфикъ кьолев Аллагь вукIинги кIочон, жинцаго щиб бугониги нухда билълъанхъизабизейин инсан лъугьани, гьеб ишги баракат бахъараб букIуна.
– Цогидазе кумек гьаби, диналъул вац-яцазул хIажатал тIурай. ХIадисалда абун буго: «Аллагь вукIуна Жиндир лагъасул хIажатал тIуралевлъун, гьев лагъ диналъул вацазул хIажатал тIуралев вугевгIан заманаялъ» (Муслим).
– Кьижилелде цебе 33 субхIаналлагь, 33 алхIам-дулиллагь, 34 Аллагьу акбар аби. Бухариясги Муслимицаги бицараб хIадисалда рекъон, ФатIимат, рукъалъул пишаби гIемерлъун, захIмалъиялде ккедал, гьелъ Аварагасда ﷺ кумекчIужу кьеян гьарана. Гьелдасаги лъикIаб жинца дуда малъилин абун, гьаб цIализе малъана Аварагас ﷺ. Гьаб буго баракат лъеялъе бищун бигьаяб къагIидабазул цоябги, суннат тIобайги. Гьал калимаби цIалиялда тIадчIей гьабурасе Аллагьас кьола тавфикъги хIалги киналго ишал жинцаго камилго тIоразе.
