25 сон ана
25 сон ана
Жакъа къоло щуго сонилъ ругел яги гьелдаса дагьал сонал гIумруялъул барал гIолохъабазда нилъеца бицунеб жо лъаларо. Щайгурелъул гьеб иш ккана 1999 соналъул 7 августалда. КигIанго рохалилаб хабар гьечIониги, ракIалде щвезабизе кколеб буго. Гьеб къоялъ чачаназул рахъалдаса Дагъистаналъул Болъихъ районалде тIаде кIанцIана, ХатIабил бетIерлъиялда гъоркь, террористал. Гьезул аслияб мурадги букIана «исламалде» Дагъистаналъул халкъ ахIи.
Ярагъги босун, ракълилал гIадамалги гъурун, бусурбаналлъунго гьарурал гIадамал исламалде ахIулел «бахIарзал» ккана гьел. Гьелдаса заман иналдего гьезулго чукъби тIаде кIанцIана Новолак ва Казбек районаздеги.
Гьеб хабар рохалилаблъун ккечIо жидерго рукъзалги рехун тун нахъе ине ккарал Болъихъ районалъул росабазул гIадамазе. Гьеб хабаралъ рохизаричIо гьенир чIван яги лъукъун жидер лъимал, гIага-божарал камурал гIадамалги.
Гьеб вахIшияб лъугьа-бахъин ккарабго Дагъистан цолъана къараб зар гIадин. Дагъистаналъул муфти АхIмад-афандияс ретIана рагъулаб партал ва хIадур вукIана тIаде кIанцIарал вахIшиял террористаздаса Дагъистан цIунизе. Гьесул хьолбохъ чIун рукIана Динияб идараялъул хIалтIухъабиги. ЛъикIаланго къадар гIалимзабазулги жамгIиял церехъабазулги гьел террористазул къурбаналлъунги ккана. Дагъистаналъул чарангIан къвакIарал ракIал ругел бахIарзаз щибго къуркьи лъазабичIо, федералазул къуват бачIинегIан ругелъуса кьуризе риччачIого чIезаруна тушбаби.
Гьеб заман букIана Дагъистан рагъ ккеялъул балал тIогьиса билълъунеб мех. Террористазул рахъги ккун, мекъаб рахъалде арав, жиндир ватIаналъе хиянат гьабурав цониги гIолилав ккечIо Дагъистаналда. Амма гьел террористазда гьоркьор дагъистаниял камунги рукIинчIо.
Руччаби-лъимал, хараби цадахъ рахъана гIолохъабигун жидерго ватIан цIунизе. ВатIаналде вачIарав тушманасе рес кьезегIан яги гьезие мутIигIлъун чучизегIан рухI кьезе хIадур вукIана щивав дагъистанияв.
Гьеб заманалда Дагъистаналъе хIалае ватана Россиялъул бетIерлъуда вугев В. Путин. Сундасаго хIинкъичIого гьев вачIана Дагъистаналде, хIатта жеги тIубанго хIинкъи гьечIолъи букIинчIеб Болъихъ районалде. Гьес кьварун лъазабуна террористал кколин инсанияталъулго тушбаби, гьездаса бацIцIадги гьабизе бугин тIолабго Дагъистан абун.
Гьел лъугьа-бахъинал ккаралдаса 25 сон аниги, сон-церекъад букIарабгIанги щибго кIочон гьечIо. Гьеб ракIалде щведал циндаго бачIуна рекIелъе пашманлъи гьел къояз букIараб захIмалъи цебечIун, гьединго, рекIелъ батула рохелги дагъистаниял гьезде данде, цо заргIадин рахъин бихьун букIиналъги.
