Риидалил курсазул хIасил
Риидалил курсазул хIасил
ХIурматиял бусурбаби, гьале ахиралде щвана лъималазул риидалилал курсал. Гьаб кIиго моцIида жаниб лъималазе щвана лъикIаб лъай, гIумруялъул хIалбихьи, ккана батIи-батIиял лъималазулгун лъай-хъвай, щвана чанго батIи-батIиял бакIазде экскурсияз, гьаруна спортивиял ва гIелмиял къецал. ХIасил гьабун абуни, лъималазул риидалил къоял гIадада инчIо.
Мажгитазде, курсазде лъимал ун рукIинчIелани я къалъизегIан кьижун яги гIадада къватIал сверулел, телефоназда жанир рукIун инаанха. ТIокIаб квешлъиялъул дица гьаниб бицунеб гьечIо. Гьеб лъабабго гIемер пайдаяб гуреб жоялдаса лъимал хвасарлъиги кIудияб талихI буго умумузе.
Балагье нилъехъго, гьанже гIураб заманалда ругелщинал квешал тIабигIатал, лъикIал гурел пишаби кидаялдаса байбихьун ругел нилъелъ? Гьайгьай гьитIинго лъуна гьелъие кьучI. Амма гьеб заманалда квешлъи гьабизе регIизе течIого цониги лъикIал ишазде тIамун рукIаралани гьелдаса рорчIизе ресги букIана. Масала, хъалиян бухIулесда цIехани кидайин байбихьараб ва щиб гIиллайин ккараб гьелъие абун, гьесул жаваб букIуна кIиабилеб яги лъабабилеб классалдаса бахъараб байбихьанин, сабаблъунги цогидал чIахIиял лъимал кканин абун.
Балагьеха, бусурбаби, лъимал щиб бугониги пайдаяб жоялде машгъул гьаричIони квешаб ишалде гьел инчIого рукIунаро. ГIурусазул аби буго «свято место пусто не бывает» абун, ай лъикIаб бакI чIобого хутIуларин, лъикIлъи гьечIони квешлъи бачIинчIого букIунарин абураб.
Аллагьасе рецц буго, нилъее лъимал лъикIаб ишалде руссинаризе мажгиталги, гьенир мугIалимзабиги кьурав. Гьел рукIинчIелани мухьги кьун кквезе кколаан. Бугеб нигIматалъул къимат гьабун, гьелдаса пайда боси ккола бищун кIудияб щукру гьабилъунги.
Умумуз гьанже кIвар гьабизе рекъола рии бачIинегIан лъимал эркенго течIого тIубараб цIалул соналъги мажгиталде яги мадрасалде хьвадизаризе. РиидаллъизегIан тани, араб соналъ цIаларабги кIоченабун гъобго жо такрар гьабулел хутIула. Гьединлъидалин школалдаса рахъарабго яги гьенире иналде лъимал мажгиталде хьвадизаризе лъикIаб бугеб. Школалъул программаялъе щибго захIмалъиги букIунаро цо сагIаталъ мажгиталда цIалдонин абун. Аллагьас кумек гьабеги лъималазе битIараб тарбия кьезе.
