Унел руго къоял

Унел руго къоял, рабигIул-аввал,
Къиматаб, хирияб дур шагьруялъул.
ТIерхьун унел гьале, дур моцIрол къоял,
Рогьел рехилалде цIваби кинниги.

Мавлидал ахIулел, ХIабиб веццулел,
ХIасратав авараг  цеве тIамулел.
ТIолго дунялалъе канлъи бакулеб,
Кан босун витIарав, хирияв Расул.

Свалат-салам битIун ТIагьа рехсолел,
ТIадегIанав Аллагь кIодо гьарулел.
Гьайбатаб нуралъул рессун гьарурал,
Авараг  вижараб хириял сардал. 

МархIабайин ахIун ХIабибил уммат,
ХIалкъваялде руссун, руссен гьабулел.
Гьаб ислам-дин босун нижее кьурав,
Вокьулев, дур Расул, алхIамдулиллагь.

РачIа гIодор чIезин гор свериялда,
ГIищкъуялъ бухIулеб битIизин салам.
Салам, салам, салам, хирияв ТIагьа,
Дур агьлулъун рати, алхIамдулиллагь.

Свалат битIун бицен гIемер гьабизин,
Зодихъ бакъ гIадинав аварагасул.
Гьесул гIумруялъул, гIагарлъиялъул,
ГIагарал, хириял асхIабзабазул.

Мавля йаса ахIун, ахIи гьабизин,
ТIагьал шапагIалъи нилъейго щвезе.
Щукру Аллагьасе ракI-ракIалъ кьезин,
Вокьулев ХIабибгун рахъине хьулалъ.

Гьарурал мавлидал къабул гьареги,
Къудратав Аллагьас кодор росаги.
Гьарарабщиналъе бачараб Амин,
Аминзабаз щвалде щвезе гьабеги.

ПАРИХАН МАЖИДОВА