ХIайранлъула, имам, дур къвакIиялда...

ЧIухIун эхетарал мугIрузда цIехе:

Кин рухI кьун рагъарал дол магIарулал?

Гъваридал кIкIалазе суалалги кье:

Чан бидул гIор чвахун билбагIарлъарал?

.....

Сундуе гIолоха гьез гIумру кьураб?

Динул Ислам тIегьан, роцIун бачIине,

Дагъистан, гьаб ВатIан эркен хутIизе,

Капуразул зулму рикIкIад гьабизе.

.....

Шамилил рагъалъул нугIлъун букIараб

Хехаб гьуриялда бицине гьабе,

Щиб къо хIехьон, цIорон, ракъун ва къечон

ЦIунун щвезабураб нилъехъе Ислам.

.....

Чамазул беразда магIу ххулараб,

Хирияб ВатIанан, рухI босун араб.

Чалма къан, хеч босун мугIрул руччаби

Рагъул майданазда шагьидлъун хварал.

.....

ГIисинал лъималаз, багьадуралцин

Гьаризе гIажизал гьунарал ккурал.

Аза-азар солдат, кIудияб отряд

Дагьал муридзабаз гъурун лъугIарал.

.....

Къоло щуго соналъ рагъуе кьурав,

ХIайранлъула, имам, дур къвакIиялда.

Бищун божи бугел хияналъидал,

Чаранкьуру гIадин, къуркьичIев дуда.

.....

Щунусазар солдат вачIараб мехалъ,

Бералцин къапичIо, кьурун вуссинчIо.

«Щиб гьанже гьабилеб?» - гьикъа-бакъидал,

«КIиго къоялъ чIа», - ян буюрухъ щвана.

.....

Иман щулалъиялъ, рекIел къвакIиялъ,

Таваккал тIамиялъ иш билълъанхъана.

Июнь моцI, багIари, барщараб курак,

Кинги бана гIазу, накахъе щвараб.

.....

МагIарулал чIвазе ишана ккурал,

Байбихьана хвезе гIурус солдатал.

ТIеренаб ретIелгун рачIун рукIарал,

ЦIорой тIамун Бичас, гъурун лъугIана.

.....

ГIемерал солдатал холелги ругин,

Нахъе руссун лъикIин, ургъана сардар.

МугIрузул Дагъистан жахIабгоги тун,

Къулараб бетIергун, тушман лъутана.

.....

Дир хириял яцал, диналъул вацал!

Цо гьари буго дир, гIин гьелде тIаме:

ЯхI-намус рехараб пиша гьабуге,

Гьал нилъер умумул нечезаруге!

ХАДИЖАТ САЙИДМУХIАММАДОВА