КантIи кьеги щивасе

Жиндирго гӀамалалда
МугъчӀвай гьабун чӀарасе,
ГӀамалал цӀалеб мехалда
Бергьенлъиго щоларо.

Аллагьасул рахӀматалъ
Бергьанани гурого,
Лагъасе цӀобго гьечӀо
БатӀиясул, хьул лъезе.

ТӀад ругезда нахърилълъун
Гьабе амру тӀубазе,
Сурат гьедин бахъани
Рихьдае букӀунарин.

«АтӀигӀу» - йилан абун
БитӀараб амру буго,
Амруялда нахърилълъин
Рияъ кколаро, бичӀчӀа.

Аллагьасда цебеги
ИтӀагӀат босун рилъа,
Цогидал урхъуледухъ
Ихласалдаги тӀубай.

Доб-гьаб ракӀалдеги ккун
Бокьухъе гьабичӀого,
ЧӀового хутӀиларо,
Сабруялдаги баче.

Эбел

Дир хирияй, хӀеренай, хӀурулгӀин гӀадай эбел,
Ургъалилъ дун вачӀани, гьеб бичIулей, дир эбел.
Рохел босун вачӀани, гӀахьал гьабулей эбел,
Нусго сон дица бани, гьебги дий кьурай эбел.

Дудаса халкъ Бижарав рази ватаяй, эбел,
Бахъанщинаб галиги, хӀухьел, бер балагьиги.
Дие гӀоло гьабураб кинабго квер багъари,
Аллагь жинда разияб аза-азарлъун хъвайги.

Дун гьитӀинаб мехалда рорчӀанщинал дур сардал,
ГӀоданщинаб мехалда берцин бицараб рагӀи,
Вакъарабго кваназе дие кьураб квен рикӀкӀун,
Аллагьас дур даража цIикIкIинабеги, эбел.

МУХӀАММАД НУРМУХӀАММАДОВ