Заралияб хiутi-хъумур

Риидалил заманалда гIемерлъула хIутI-хъумур. Цоязул зарал букIуна, цогидазул букIунаро. Кин бугониги, гьезул цо-цоял чIванги ккола. Гьединлъидал пикру ккана гьел чIвазе бегьибегьунгутIиялъул хIукмуялъул къокъабго баян гьабизе.

Аллагь вуго ракьалда бугебщинаб жинца инсанасе пайдаялъе ва нигIматлъун бижизабурав, чиясги гьеб шаригIаталъ бихьизабураб нухалдалъун хIалтIизабизе. Аллагьасул махлукъатлъунги бугеб хIутI-хъумур, жидер рижиялъул аслуго заралияллъун ругел чIвазе бегьула, гьеб лахIзаталда жидедаса зарал батичIониги.

Гьединазда гьоркьор руго аварагас хIадисалъулъ жал рехсарал: «Щуго хIайван буго жидеца зарал гьабулел, гьел чIвазе бегьула хIарамалъул ракьалда ругониги: гъеду, сокол (коршун), гIакъра, гIункIкI ва тIаде кIанцIулеб гьой», - ян (Муслим).

ГIалимзабаз бегьизабун буго хIадисалда рехсаразда релълъинарун гьелго гIадал цо-цоялги, мисалалъе, гьоялда релълъинабун буго бацI. Щибго я зарал гуреб я пайда гурел гIалхуда ругел чIвазе гьукъараб буго. Жидер рижиналъул аслуго заралиял гурел хIутI-хъумур, хIайванал чIвазе бегьуларо, жидедаса зарал яги тIаде кIанцIун пасалъи гьабиялда хIинкъи гьечIебгIан мехалъ.

Ибну ГIабасидасан бицун буго: «Ункъо жо чIвазе аварагас нахъчIвана: цIунцIра, най, гьудгьуд ва сорокопута (гьеб буго бетIерги кIудияб, чохьокь бакIги хъахIаб, мугъги гIурччинаб хIинчI)», - абун (АхIмад).

Байгьакъияс бицараб риваяталда гьеб ункъалдего тIаде къверкъги рехсолеб буго. Гьездасаги чиясе зарал бугони, ихтияр кьун буго чIвазе. Амма тIоцебе гьес хIалбихьизе ккола чIван гуреб, цоги батIияб къагIидаялдалъун гьел тIагIинаризе, нахъе хъамизе. Гьедин гьабиялдалъун хIасил кколеб гьечIони гурони бегьуларо чIвазе. ЧIвалелъулги гьукъараб буго цIаялъ рухIун хвезаризе. Щайин абуни, аварагас абулеб буго цIаялдалъун гIазаб гьабизе Аллагьасе гурони цоги лъиего ихтияр гьечIин (Абу-Давуд).

Гьединлъидал, хIутI-хъумур тIагIинабулелъул, тIоцебесеб иргаялда, хIалтIизабизе ккола гьел жалго нахъе унеб къагIида. Гьиси-бикъинаб гурони зарал батичIони, рекъараб букIина тIагIинариялъул нух хIалтIизабичIого тезеги. Аварагас абунин Абугьурайратидасан бицун буго:

«Цо нухалъ пуланав аварагасда хIанчIун буго цIунцIраялъ ва гьесул буюрухъалдалъун цIунцIрабазул бусенго бухIун буго. Цинги Аллагьасул вахIю щун буго гьесухъе: «Дуда хIанчIараб цо цIунцIраялъе гIоло, БетIергьан рехсолеб букIараб тIубараб умматгойищ дуца хвезабураб?» - абун (Муслим).

Аллагьас цIунаги!

МУХIАММАДГIАРИФ КЪУРБАНОВ, «АС-САЛАМАЛЪУЛ» МУХБИР

2026-05-15 (ЗулкъагIида 1447 с.) №10.

«Инсан» фондалъ байбихьун буго Маккаялда къварилъиялда ругел гӀадамазе садакъаде бикьизе къурбан хъвезе бокьаразул гӀарзаби къабул гьаризе. Фондалъ тӀубазабизе бугин тӀолабго иш: къурбаналъе хъвезе хӀайван боси, шаргӀалъул къануназда рекъон гӀид тӀубай ва Маккаялда къварилъиялда ругезе...

ХIежалъ гIисинал ва чIахIиял мунагьал чурулищ? ГIемерисел гIалимзабазда аскIоб хIежалъ гIисинал мунагьал чурула, амма кIудиял мунагьал ва гIадамазул хIукъукъал чуруларо. Бухари ва АхIмадица бицараб хIадисалда буго: «ХIеж гьабураб мехалда жинца абичIони квешаб рагIи ва гьаричIони фискъуялде...

Казбек районалъул Дилим росулъ тӀобитӀана районалъул диниял вакилзабазул данделъи. Гьелда гIахьаллъи гьабуна «Ас-салам» газеталъул, лъай кьеялъул управлениялъул, «Инсан» фондалъул, районалъул гӀолилазул жамгӀияб гӀуцӀиялъул хIаракатчагIазги. Тадбир рагьана хирияб Къуръан...

Гьал къоязда магIарул мацӀалда бахъулеб «Ас-салам» казияталъул редакциялъул хӀалтӀухъаби щвана Шамил районалъул Бакълъухъ росулъе. Редакциялъул хӀалтӀухъаби дандчӀвана росдал бегавулгун, школалъул нухмалъулевгун, мадрасаялъул ректоргун цогидалги жамгIиял хIаракатчагIигун. Гьезулгун...

Кинал ругониги балагьал рачIиндал нилъеца цоцазе кумек гьабула. Гьеб буго тIабигIияб жоги. Амма буго щибаб къойил кколеб балагь, нилъги жинде ругьунлъараб. Гьебги ккола нухазда кколел авариял. 2026 соналъул лъабго моцIида жаниб ккана 357 авария, хвана 61 чи, лъукъана 510-яв, гьезда гьоркьор руго...

Заралияб хiутi-хъумур