Хваразе пайда цIикIкIараб
ХIурматиял диналъул вацалгун яцал! Нилъ киналго руго хвезе рижарал чагIи. ЧIаго нахъе хутIулев чи гьаб дунялалда цониги ккечIо, нахъеккун ккезеги гьечIо.
Хвел тIаде щвей балагьуларо гIолохъанлъи-херлъиялъухъ, сахлъигун унтиялъухъ. Риччарал къоял лъугIарав чияс гьаб панаяб дунял тола. Гьеб заманалда лъугIун ккола дунялалда нилъер киналниги ишалги. Нилъ хутIула нилъерго гIамалалгун цадахъ. Гьеб буго бищун чара бухIараб заманги. Гьаб дунялалда рукIаго гIемер лъикIлъи гьабунги нилъехъа бажарулеб гьечIо, гIемер батIи-батIиял жалаз машгъулги гьарун, ракьул чохьонир ратулел руго. Гьеб мех ккола бищун захIматазул цояблъун.
Гьединлъидал устарзабаз, хIакъикъиял муршидзабаз нилъеда малъулеб бугеб гIага-бажарал, рукъалъул агьлуялъул чи хвараб заманалда гьезие пайда цIикIкIараб гIамал гьабейилан абун.
ТIоцебе 100 истигъфар гьабила, хадуб 100 суратул ФатихIа, ай алхIам цIалила. Цинги 10 суратул Ихлас, ай Къул гьува ллагьу цIалила ва 100 салатул ФатихIат цIалила. Хадубги 100 нухалда истигъфар гьабила. Гьелъул кири хварав чиясеги кьела.
Бажарани, бисмиллагун цадахъ, суратул ФатихIа цо хIухьлада цIалила. Гьединго лъабго Къулгьуги цо хIухьлада цIалила.
Лъиего балъгояб жо гуро, тагIзияталда гIададисеб каламалда, махсаро-хочIалда нилъ рукIунеблъи. Гьединаб бакIалда цIакъ рекъараб букIина гьаб цIализе. Щайгурелъул, тIоцебесеб заман буго хварав чиясе бищунго захIматаб.
