Гьоболасул хиралъи

Нилъехъе вачIунев гьоболасда цадахъ Аллагьасул рахIмугун гурхIелги букIуна. Гьоболасда цадахъ кIиго малаик вачIунелъул, гьев чиясул рукъалда баракатги лъола, Аллагьас гьесул мунагьалги чурула ва кириги хъвала рукъалъул бетIергьанасе гьобол гьенив вугебгIан заманалда жаниб.

Свалат-салам лъеяв Аварагас абун буго: «Гьобол гьечIев чиясул щибго лъикIлъи гьечIо», - ян.

Гьелъул магIна ккола гьобол вугев чи цогидаздаса хирияв вугин абураб. Гьоболасул хIакъ тIубазеги рекъараб буго бусурбанчиясда, ай гьеб ккола хирия Аварагасул суннат. Ибрагьим аварагасе кутакалда рокьулел рукIун руго гьалбал. Гьобол хирияв абураб цIаралда гъоркь машгьурлъунги вукIун вуго гьев. Гьобол аскIов гIодов чIун ва гьесухъа ихтияр босун гурони кваналевги вукIун гьечIо. Гьев бакъ тIерхьунеб гIужалъ къватIиве вахъунев вукIун вуго гьоболлъи гьабизе чи валагьизелъун.

Аллагьас Къуръаналда абулеб буго (магIна): «Я, МухIаммад, Дир лагъзадерида бице, Ибрагьим аварагасухъе тIаде гьалбал рачIиналъул ва гьес гьел къабул гьариялъул хIакъалъулъ. Гьединго бице, гьез досда абулин дуде Аллагьасул рахъалдасан салам бугин», - абун.

Аварагасул хIадисалда буго гьоболасул дугIа Аллагьас къабул гьабулин абурабги. Абу Гьурайратица бицун Аварагас абунин:

«Къиямасеб къоялдаги Аллагьасдаги божулев чияс гьоболасул къимат гьабе ва ракI-ракIалъ гьев къабулги гьаве», - ян ( Бухари, Муслим).

ХАЛИД ПАЙЗУЛАЕВ, ДГИЯЛЪУЛ ТIАЛИБ