ГIибадаталда тIамизе къуват кьеги
Дагъистаналъул муфтиясул Рамазан моцI тIаде щвей барки
Ассаламу гIалайкум, хIурматиял диналъул вацал ва яцал!
Рамазан моцI нилъее сайгъат гьабурав БетIергьанасе буго аза-азар рецц. Гьаб кколелъулха Аллагьас ﷻ нилъер мунагьал чуриялъул ва баракат гьарза гьабиялъул моцIлъун. Гьединлъидал, ракI-ракIалъ баркула нужеда тIаде щвараб хирияб Рамазан моцI!
Рамазан ккола ТIадегIанасе гIибадат гьабиялъе, лъикIал ишал гьариялъе, нужецаго гьарурал пишабазул пикру гьабиялъе ва рухIияб цебетIеялъул рахъ камил гьабиялъе заман кьезе кколеб хасаб моцI. Гьеб моцIалъ рештIана лъикIлъи гьабиялде нилъ ахIулеб ва квешаб теялде кантIизарулеб Къуръан. Гьебги ккола щивав бусурбанчиясе къимат тIадегIанаб гьадият, Жинда нахъвилълъарасул авалги ахирги битIун кколеб. Гьединлъидал, гьарула БетIергьанасда нилъерго умумузде лъикIаб бербалагьи ва ахираталъул рокъоре аразе дугIа-алхIам гьабизе къуватги сахлъиги кьегийин киналго бусурбабазейилан.
Рамазан ккола лъикIал ишал гьарулеб моцI. Гьелъин цIакъго хIаракатги бахъизе кколеб мискин-пакъирасда кверчIваялъеги, янгъизго хутIаразе кумек гьабиялъеги, гьебгиха, гьез гьабулеб диналъухъ ва гьезул миллаталъухъ балагьичIого. Аллагьас ﷻ нилъее кьун буго заманалъулаб нигIмат - буголъи ва кIвар буго гьелдаса битIун пайда босиялъул, гьеб битIун хIалтIизабиялъул. Нилъеда кIочон тезе бегьуларо гIицIго ресукъазе, мискинзабазе кьуралъул бетIергьаби нилъ рукIин.
ДугIа-алхIам, Аллагьасе ﷻ гIибадат гIемер гьабизе тIадаб гьаб моцIалъ киналго ращад гьарула. Бечелъи-мискинлъиялъухъ балагьичIого гьаб моцIалъ кIал ккола кинавго чияс. Бечедал, рес бугел бусурбаби, мискинал диналъул вацазул бакIалда жалго ругеб хIисабги гьабун, сверухъ ругезе сахаваталлъун, квергIатIидаллъун лъугьуна.
Гьаб хирияб моцIалъ дица киналго ахIула нилъецаго гьарулел ишазегун хIалтIабазе нилъецаго къимат кьеялде, гIумру гьабиялъул къагIидабазда тIад ургъиялде, нилъерго тIабигIат-гIамал берцин гьабиялде, гIун бачIунеб гIелалъе битIараб тарбия кьеялде.
Биччанте нилъ цере гьарурал мунагьаздаса рацIцIадаллъун ва ккурал кIалал ТIадегIанав Аллагьас къабул гьарулезул кьеразулъе ккараллъун рукIине.
ДРялъул муфтияталъул цIаралдасан ва дирго рахъалдасан цоги нухалда баркула тIаде щвараб хирияб Рамазан ва гьарула гьаб моцI ТIадегIанасе гIибадат гьабиялда тIамизе щивасе къуват ва сахлъи.
АхIмад-хIажи ГIабдулаев, ДРялъул муфти
