КIалбиччаялъул гIид
КIалбиччаялъул гIид
Хириял диналъул вацал ва яцал! Аллагьасе ﷻ рецц гьабун хIал хьоларого букIуна ракIалъул, Гьес ﷻ, нилъее хирияб гурхIел-рахIмуялъул, мунагьал чуриялъул ва рацIцIалъиялъул Рамазан моцIалда жаниб гIамал гьабизе рес кьуралъухъ.
Аллагьас ﷻ къабул гьареги гьал баракатал къояз ккуралщинал нилъер кIалалги, рарал какалги, гьарурал лъикIал гIамалалги. Ва гIилла букIун жидер къасдал тIуразе кIвечIезе, ТIадегIанав Аллагьас ﷻ гьезул ракIбацIцIадаб къасдалда рекъон кири кьеги, сахаватго Жиндирго ﷻ рахIму-цIобги гьабеги.
Гьарула гьаб хирияб моцIалъул баракат тIубараб соналъ нилъер ракIазулъ хутIагиян, гьеб нилъее къуваталъул, сабруялъул, гIакълуялъул цебехъанлъун лъугьине.
Аллагьас ﷻ цIунаги нилъги, нилъер лъималги, гIага-божаралги киналго къварилъабаздаса, балагьаздаса, дагIба-рагIиялдаса, квешлъиялдаса ва нилъер рукъзалги парахалъиялъ, хинлъиялъ, рекъелалъ цIезареги.
Биччанте гьаб байрам нилъее киназего лъугьине рухIияб рацIцIалъиялде, вацлъиялъул бухьенал щулалъиялде, гIадамазда гьоркьоб рекъел ва цоцада ричIчIиялде рачунеб нухда тIамулеб цIияб галилъун.
Биччанте гьелъ нилъ жеги цIикIкIун исламалъул насихIатазда хадур рилълъине, лъикIлъиялда, рахIму-цIобалда хьвадизе ругьун гьаризе.
Баркула нужеда КIалбиччаялъул гIид!
