Авараг ﷺ веццун назму

Авараг ﷺ веццун назму

Хунзахъ районалъул ГьоцIалъ росдал цIалдохъабазда гьоркьоб тIобитIана, свалат-салам лъеяв авараг веццун назму гьабиялда тIасан къецал. Гьелда гIахьаллъи гьабуна 50-ялдасаги цIикIкIун чияс.

Гьединго къецазда гIахьаллъи гьабуна росдал имам СалихIов СалихIица ва Хунзахъ районалъул гIолилазул гIуцIиялъул нухмалъулев Шамхалов Сайфулагьица.

Щивасул рукIана махщалида гьарурал байтал. Кинниги гьезда гьоркьоб тIоцебесеб бакIалъе мустахIикълъана 6-абилеб классалъул цIалдохъан ГIабдулхIалимов Юнус. КIиабилеб бакI щвана 8-абилеб классалъул цIалдохъан ХIасанов МухIаммадие. Лъабабилеб бакI ккуна 8-абилеб классалъул цIалдохъан ХIусенова ХIалиматица.

Бергьаразе кьуна сайгъаталги. Масала, тIоцебесеб бакI ккурасе анцIазарго гъурущ, кIиабилеб бакIалъухъ - анкьазарго гъурущ ва лъабабилеб бакI щваралъе - щуазарго гъурущ.

Дир авараг ﷺ

Дир авараг МухIаммад ﷺ,

Щибаб рецц Аллагьасе

Иманалда ратидал.

Дир авараг МухIаммад ﷺ,

РахIматлъун кьун ватидал.

АлхIамдулиллагь жеги,

Дун гьесул умматалъул,

Щукру дуе, БетIергьан,

Щаклъизе бакI гьечIелъул.

АхIмад ﷺ жанив гьавураб

РабигIул аввал дие,

Дунял дица тезегIан те,

Аллагь, гьеб Дур нигIматлъун.

ВихьичIого вокьарав,

РагIичIого урхъарав,

Ваче, Аллагь, нухдасан,

ЦохIо Расул хьвадараб.

Хьихье, Аллагь дуца ниж,

Иманалда гIумру ун,

Авараг разилъулеб

ГIамалги нижее кьун.

Даимаб, абадияб,

Берцинаб тIабигIатги,

ТIаса ин гьечIеб пагьму,

Гьарула, насиб гьабе.

Дир хирияв авараг,

Уммат хирияв ХIабиб,

ХIисаб гьабулеб къоялъ,

Восе дун шапагIаталъ.

Юнус ГIабдулхIалимов