ГьитIинаб адабалъ кIудияб асар
ГьитIинаб адабалъ кIудияб асар
Дагьабго кватIун букIаниги баркала кьезе бокьун буго «Инсан» фондалъул Хьаргаби районалда бугеб филиалалъул хIалтIухъабазе.
Ноябралъул ахирисеб гьатIан лъазабун буго «Улбузул къолъун». Гьеб байрам баркизе тIаде босарал «Инсан» фондалъул хIалтIухъаби МухIаммадов Юсупие, АхIмаев МухIаммадсайпулае, Къурбанов Къурбание ва цогидалги кумекчагIазе азарабго баркала буго. Исана гьеб байрам баркун гьел щвана херазухъе, кIудияб хъизан нухда бачарал, гIажизал лъимал хьихьарал улбузухъе.
ХIакъикъаталдаги кIудияб асар гьабуна дие ва дир гIажизав васасе гьеб гьоболлъиялъ. Гьесул вохи ва разилъи гьезда жидедагоги бихьана. Сайгъаталда бараб жо гуро бугеб, гьединал гIадамал кIочонгутIи, гьезул тIалаб-агъаз гьабизе ва кIодо гьаризе хIадурал, гIаданлъи-яхI бугел гIадамал рукIин буго нилъее кIудияб хазина. Нижер районалда бугеб филиалалъ гIемераб кумек гьабула жидеде балагь бачIаразе, ресукълъиялда ругезе, чияр кумекалде хIажатазе. Аллагьас гьез гьабулеб кинабго лъикIлъи, кумек, гьезул хIаракат азариде бахинабеги, диналъе къуват кьеги. Гьеб гьабизе квербакъулезеги гьенибе садакъа гьабулезеги Аллагьас азарида кьабун тIадбуссинабеги, балагьал нахъчIваялъе сабаблъун ккаги.
