Аллагьас ﷻ инсан хира гьавун вуго
Аллагьас ﷻ инсан хира гьавун вуго
Аллагьас ﷻ инсан цогидаб махлукъаталдаса хира гьавуна гIакълуги, гIелмуги, берцинлъиги ва гьел гурел цогидал нигIматалги кьун. Нилъеца гьел нигIматазул пикруцин гьабуларо.
Амма цо нигIмат нахъе босани, нилъее тIубанго дунял кьогIлъула. ТIадегIанав Аллагьас ﷻ Къуръаналда абуна: «Дица Адамил лъимер цогидаб махлукъалдаса хира гьавун вижана», - ян. Инсан вукIине ккола кидаго дунял-ахираталъул пикру, Аллагьас ﷻ кьурал нигIматазе щукру гьабулевлъун. Амма нилъер иманалъул загIиплъиялъ ахираталъул пикру, Аллагьасе ﷻ щукру гьаби кутакалда дагьлъун буго. Аллагьас ﷻ Къуръаналда абулеб буго: «Инсанасул тIабигIат буго нигIматал кIочонеб, щукру дагьаб гьабулеб», - ян. Инсанасул тIабигIаталъул гIуцIи, нигIматал кIочонеб, балагь-къварилъи ракIалда чIолеб буго. БетIергьанас гIумруялда жаниб цо нухалъ нилъер хIалбихьун унти-балагь биччани, гьеб нилъеда гIумруялъ кIочонаро, дица хIехьараб жойин абун кидаго бицунелги рукIуна. Амма Аллагьас ﷻ щибаб къойил кьолел нус-нус нигIматал нилъеда ракIалдецин щоларо. ХIатта гьел нилъее кьезе кколел гIадин ракIалдеги ккола.
