ГIелмуги гIамалги рекъарав
Бокьун буго баркала кьезе Гъуниб районалъул КIуяда росдал Агъада бугеб мажгиталъул имам ХIажимурад МухIамадовасе гьес росулъ гьарулел ругел тадбиразухъ. ХIажимурад вуго бицун хIалкIолареб рецц-бакъалъе мустахIикъав инсан. Гьев вуго гIадатияв муъминчи, чIухIи, пахрулъи жиндилъ гьечIев, чIахIиязул адабги, гIисиназул хIурматги гьабулев, тIарикъаталъул устарзабиги кколев, гIелмуги гIамалги рекъарав Аллагьасул лагъ.
ХIажимурадица дарсал кьола щибаб анкьалъ, щибаб колоде вачIун данде гьарула жамагIатал. Гьединго Къуръан цIализе малъана Агъада школалъул цIалдохъабазда. Щибаб моцIрол ахиралда данде гьарула шагьаралда ругел гIолохъаби. ХIажимурад щола зияраталъ унтаразухъегун херазухъе.
Гьесул гIаданлъи, хIеренлъи баян гьабун гьаб гьитIинабго рисалат битIичIого яхI гьабизеги кIвечIо. Жакъа ниж разилъарал гIадин Аллагьги разилъаги гьесдаса.
Инсан берцин гьавула берцинаб тIабигIаталъ, гIамалалъ, адаб-хIурматалъ. Гьеб кинабго Аллагьас рекъезабун кьурав чи вуго ХIажимурад.
Нижеца гьесие гьарула щулияб сахлъи, халатаб гIумру, хадубккунги гьедин хIалтIи гьабизе тавпикъгун къуват.
