ЖамагIат рази буго
Ассаламу гIалайкум, «Ас-салам» казият. Ниж ккола Хъумторхъала районалъул Темиргъое росдал жамагIат. Нужехъе хъвалеб буго, росдал имамасе ракI-ракIалъулаб баркала загьир гьабизе бокьун. Нижер имам ккола ЧIикIаб росулъа КазимухIаммадов ХIамзат.
Исламияб институтги лъугIун нижер росулъе хIалтIизе гьев вачIана ункъо соналъ цебе. Гьел соназда жаниб, ХIамзатил хIаракаталдалъун, росулъ гьаруна диниялги жамгIиялги гIемерал хIалтIаби. Росдал мажгиталъуб гьабуна ремонт. АскIобго букIана, байбихьиги лъун чIезе тараб мадраса. АлхIамдулилЛагь, имамасул цевевахъиналда гъоркь кIитIалаяб мина бан рагIалде бахъана.
Нижер буго батIи-батIиял миллатазул, рахъ-рахъалдаса рачIарал гIадамаздаса гIуцIараб росу. Бугониги, росулъ вугев имамасул бажариялдалъун, гьанже жамагIат лъугьана щиб хIажалъи кканиги букъараб зар гIадин цоцае хIалае чIолеб, гъункараблъун.
Гьесул нухмалъиялда гъоркь росдал жамагIаталъ чанго нухалъ гIахьаллъи гьабуна РухIияб центр балеб бакIалда гьабулеб хIалтIулъги. ХIамзат вуго кутакалда гIадамасда хIал бащад гьабун, щив аскIове кканиги гьесда рекъараб хабар бицун инсан рази гьавулев муъминчи. ВагIза-насихIат гьабун ХIамзат щола школалде, росулъ тIоритIулел батIи-батIиял спортивиялгун жамгIиял тадбиразде. Гьанже Темиргъоялда ХIамзат лъугьана цIикIкIарасе васлъун, гIел бащдазе вацлъун.
Ниж цIакъ рохарал руго гьесдаса ва бокьун буго жамагIаталъул рахъалдасан ракI-ракIалъулаб баркала загьир гьабизе.
