Лъалищ нужеда?
Какил таъвилатал
Аллагь разилъаяв ГIали-асхIабас абун буго: «Какил таъвил лъачIони камилаб как букIунаро. Таъвилги лъазе гьабун цо как бани, 70 азарго барабгIан кири букIуна», - ян.
Гьел таъвилаталги гьал руго:
- Как бухьунеб мехалъ кIиябго квер кIиябго гIиналде борхиялъул таъвил буго – Аллагьасул лъай гIадамасул лъаялда релълъараб гьечIин абураб магIна.
- РукугI гьабиялъул таъвил – дир черх хIелула Аллагьасе.
- СамигIаллагьиялъул таъвил – дир рукугIги дир суждаги рагIула ва бихьула дун вижарав Аллагьасда.
- Суждаялде иналъул таъвил – дун гьаб ракьалдасан вижарав вугин абураб магIна.
- Эхеде ворхиялъул таъвил – Дуца дун, Аллагь, ракьалдаса вахъине гьавунин абураб магIна.
- КIиабилеб суждаялъул таъвил – нахъеги ракьалде руссине ругин абураб магIна.
- КIиабизе рорхиялъул таъвил – къиямасеб къоялъ ракьалдаса рахъине руго абураб магIна.
- ГIодов вукIараб мехалъ квегIаб хIетIе бегун лъеялъул, кваранаб бахъун чIезабиялъул таъвил – дица батIулаб жо гIодобе рехулин, хIакъаб бахъун чIезабулин абураб магIна.
- АттахIиятуялда гIодов вукIиналъул таъвил – дир Аллагьасде хьул лъола дида гурхIиялда, мунагьал чуриялда абураб магIна.
- Салам кьеялъул таъвил – нуж Аллагьас хвасар гьареги къиямасеб къоялъ, дунги хIинкъихьулалда вугин абураб магIна.
