Балагьал нахъчiваялъе бигьаяб сабаб
БетIергьанас инсанасул гьаб дунялалъул рокъоб хIал бихьула батIи-батIиял балагьаздалъун. Гьелги рукIине бегьула гьесул черхалда, наслуялда яги магIишаталда хурхарал. Гьелъул хIикматги ккола инсанасда гьаб дунял балагь-питнаялъул, захIмалъи баччиялъул ва хехго толеб, щибго пайда жиндаса гьечIеб букIин бичIчIизаби.
Гьале нилъер заманалда баккун буго дунялалда тIадго тIибитIараб вабаалъул унти. Дунялалда тIад цониги бакI гьечIо гьеб тIибитIичIеб. Гьелдаса цIунизелъун тохтурзабаз рихьизарулел руго батIи-батIиял къагIидаби.
Гьаниб нилъеца ракIалде щвезабила балагькъварилъиялдаса цIуниялъе хириял хIадисазда ругел малъа-хъваял. Инсан балагьаздаса цIуниялъе хирияб хIадисалда лъикIаблъун рехсолеб буго садакъа кьей.
«Нужеца радал рахъун садакъа кье, гьелда тIасан бахине балагьалда кIоларо», - ян буго хIадисалда. Цоги хIадисалда буго: «Нужеца нужерго унтарал садакъа гьабиялдалъун сах гьаре», - ян.
Гьаб заманалъе данде кколеб дару садакъаялда жаниб буго.
Имам Байгьакъиясухъе вачIун вуго цо чи накалда баккараб ругъун чвахулеб бугин анкьго соналъиланги абун. Кинал тохтурзабахъе аниги, кинаб дару гьабуниги бецIцIун гурони чIолеб гьечIин абун. Цинги гьес абун буго, дуца балагьейин гIадамал лъималде хIажатаб бакI ва гьениб дурго харжалдалъун гъуйги бухъейин, жиндир хьул бугин гьениса лъимги баккун дур бохалда бугеб ругънадаса бецIцIулеб рецIгун би къотIилин абун. Гьес малъухъе гьабидал, ругъунги сахлъун буго.
Нилъеца цIакъго гIиси-бикъинаб жойин толел исламалъул ишазда жанир гIемерал хIикматал рахчун ратула. Балагьал гIамлъараб заманалда рекъараб букIина киназго данделъун садакъаби гьарулелани. Рецц Аллагьасе, БетIергьанас Дагъистаналда гьарзаго кьун руго сахаватал, бечедал гIадамал. Гьединлъидал нилъеда кколеб буго цIакъго бечедав чияс гьабулеб жойин садакъа абун.
Садакъа гьабизе рес гьечIев чи цониги ватиларин абизе бегьула нилъеда гьоркьов. Бугес бугелда рекъон гьабизе бихьизабураб жо буго гьеб. Рес бугев чи садакъаги босун вачIинегIан чIей гIакълу гуро. Хасго гьадинаб унти тIибитIараб заманалда гIезегIан руго жидер букIараб хIалтIи гьеб унти тIибитIиялъ тIаде бачIунеб капек къарал гIадамал.
Гьединазе кумек гьабун садакъа гьабизе ккела. Гьединго руго кигIанги унтарал гIадамал багьа-багьаял дараби росе рес гьечIел яги гьел росулаго кIудиял налъабазде ккарал. Гьединал гIадамазе кумек гьабуниги нилъедаса балагьал нахъчIвала БетIергьанас. Аллагьас кумек гьабеги кинабго лъикIлъиялъе ва тIолалго бусурбаби гьеб балагьалдаса цIунунги хутIаги!
Амин!
ГIАБДУЛЛАГЬ МУХIАММАДОВ, «АС-САЛАМАЛЪУЛ» РЕДАКТОР
