Мисал босизе мустахIикъав
Мисал босизе мустахIикъав
Диналъ тIад гьабураб кьуричIого тIубалев чи вуго ШайихмухIамадов Шамил. Гьесул эмен Анайил МухIаммадги вуго жигарав хIаракатчи, гӀемерал гӀалимзабиги лъалев, гьелги рокьулев инсан. Гьес васасе кьураб тарбияги букIинарищха щвалде щвараб. Гьитlинаб мехалдаса нахъего Шамилица лъазабуна мухIканго как базе ва Къуръан цӀализе.
Балугълъиялде вахаралдаса, ЦIияб ЧlикIаб росдал авал-мажгиталда хIалтIана гьев инсуда цадахъ. Мажгит бан лъугIидал, будунлъиги гьабуна, мадрасалдеги хьвадана. Гьанжеги Шамилица жигараб гӀахьаллъи гьабула мажгит-мадрасалда, гьединго росулъ гьарулел кIвар бугел жамгIиял хӀалтIабазулъ ва тадбиразулъ. Росдал жамагIаталъ гьесда тIадкъан буго хабалазул ишал тIуразеги.
ХабатIа къваригIунебщинаб къайи-алат чIезабун буго гьес. Гьединго къватIиса вачIарав чи росдал больницаялда хвани, авариялде ккун гIумруялдаса ватIалъани, гьединазда базе мусралги рукIуна гьес хIадурун. Сардилъ хварав чи вукъизе ккани, канлъи букIинелъун хабалазде бачун буго ток. Какал разе бараб рукъги цIакъ бацIцIадго чlезабун буго.
Шамилица чурула хварав чи, радал-бакъанида гьабула къулгьу. Гьес анцIго нухалда борхана хӀежги. Гьесул аслияб хIалтIи бугин абизе бегьула гIадамазул мурадал тIурай, гьезие кIвараб кумек гьаби.
БетIербахъиги гьабулеб буго хIайваналги хьихьун, ай хIалалаб магIишаталдалъун. ГӀадамазе ва росдае гьарулел пайдаял ишаздалъун, берцинаб тIабигIаталдалъун Шамил мустахIикъав вуго цогидазги жиндаса мисал босиялъе.
