КЪУРЪАН ВА РИКIКIЕН

ХIурматиял диналъул вацалгун яцал. Нилъер умматалъе кьурал бищунго кIудиял рахIматазул цояб ккола хирияб Къуръан. Гьелда жаниб данде гьабун буго церехун рукIаразулги, жеги хадур рачIине ругезулги гIелмаби. Гьеб буго нилъ, ай бусурбаби ритIун хьвадиялъе бугеб нух бихьизабулеб киналго къануназул аслуги. Гьелда жанир ругел хIикматал гьаб нилъер заманалде щвезегIан загьирлъаралги руго, жеги загьирлъичIелги руго, къиямасеб къо чIезегIан загьирлъулел рукIинеги руго. ГIелмиял хIикматал Къуръаналда ратиялъул хIасилалда ислам къабул гьабурал гIалимзабазул сияхIги гIезегIан халатаб буго.

ГIАБДУЛЛАГЬ МУХIАММАДОВ, «АС-САЛАМАЛЪУЛ» РЕДАКТОР

Хирияб Къуръаналда БетIергьанас абулеб буго:

قُل لَّئِنِ اجْتَمَعَتِ الإِنسُ وَالْجِنُّ عَلَى أَن يَأْتُواْ بِمِثْلِ هَذَا الْقُرْآنِ لاَ يَأْتُونَ بِمِثْلِهِ وَلَوْ كَانَ بَعْضُهُمْ لِبَعْضٍ ظَهِيرًا

МагIна: «Дуца абе, авараг, Къуръаналда релълъараб жо гIуцIизе инсалги жиналги данделъаниги бажаруларин, кигIан гьез цоцазе кумек гьабуниги», - ян.

Къуръаналда буго 114 сура ва 6236 аят. Къуръан бикьун буго 30 жузалде, ай бутIаялде, гьелги рикьун руго 60 хIизбуялде. Къуръаналда буго 1015030 тIанкI, 323670 хIарп ва 77934 рагIи.

Къуръаналъул сураби рикьула кIиго бутIаялде. Маккаялда авараг вукIаго рещтIарал аятазда абула Маккиял абун. Гьезул буго 87 сурат.

Мадинаялде гьижра гьабун хадур рещтIаразда абула Маданиял абун. Гьезулги буго 27 сурат. Къуръаналда анлъго сура буго аварагзабазул цIаралда рачIарал. Гьелги ккола МухIаммад r, НухI, Ибрагьим, Гьуд, Юсуф ва Юнус абурал суратал.

ТIоцебе рещтIараб сурат ккола «ал-ГIалакъ». Бищун ахиралда рещтIараб ккола «ан-Наср». Къуръаналъул бищун халатаб сурат ккола «ал-Бакъарат». Гьелда жаниб буго 286 аят. Бищун къокъаб сураги ккола «алКавсар». «Аллагь» абураб рагIи Къуръаналда рехсон буго 2707 нухалда.