Дуе нух битIаги...

Дуе нух битIаги...

Дуе нух битIаги, гендерил будун,
Билал-асхIабасда гьаракь релълъарав.
Бичасул къадар щун анин рагIидал,
Ана босун гIакълу, къварилъана ракI.
КъвакIарав, яхI бугев гендерил будун,
БачIарабищха къо, къадар лъугIараб.
Къанал дуда чIвалеб, ракьулъ вукъулеб,
Росдал агьлуялъе къо-лъикI гьабулеб.
БецIаб лахIту дуе нурлъун гвангъаги,
Къуръаналъул нуралъ бецIлъи тIагIаги. 
Мункар-Накирасе жаваб кьеялъе
АхIарал каказул кумек дуй щваги.
Дуе нух битIаги, гIазизав будун,
Мажгиталда жаниб гIумру тIамурав.
ТIадегIанаб Калам - Къуръанул Карим
Кодоса кидаго камизе течIев.
ГIусманил МухIаммад - гендерил будун,
Бичасул шаригIат цIунараб росдал.
Билал гIадав будун нижер вукIарав,
Дуе нух битIаги ахираталде.
Зигара бан назму хъвазе лъугьиндал,
Гьинал ракI гIодана, магIу чвахана.
МагIилаб чIегIераб щакъиялъ хъвазе
БокьичIого нахъе бахъун букIана.
Бищунго цебесеб гIагарлъиялда,
ГIагараб росдада, росуцоязда,
Расуласул будун - Билал гIадинав
Будун гьев вукIанин бице киназго.
АнцIила ункъо сон цадахъ тIамураб,
Цо рагIи абун ракI бакъвазабичIев.
РакI-ракIалъ эменлъи, вацлъи гьабурав,
Гьалмагъ мун вукIиналъ кIолеб букIинчIо.
Дуе нух битIаги, хирияв гьудул,
Хирияб ахират - Жаннатул фирдавс.
Жаннаталъул кавсар, расуласул хIавз,
Аллагьас дуе гьел насиб гьареги. 

Росдал харабазул совет