Дагъистаналъул тарихалда тIоцебесеб
Спорт – ракълил вакил. Спорт ккола инсан лъадарулеб, гьесда жаниб чIаголъигун сахлъи бижизабулеб иш. Бокьараб рагъа-ракари лъикIаб бугин абула нилъеда тохтурзабазги гIодорериччан чIеялдаса.
Гьеб ахIиялъе жавабги гьабун Дагъистаналда гьоркьо-гьоркьоб тIоритIула спортивиял къецал. Гьал къоязда МахIачхъалаялда тIобитIана Дагъистаналъул муфти, шайих АхIмад-афандиясул цIаралда халкъалда гьоркьосеб столалда тIад теннис хIаялъулаб турнир. Гьелъул хаслъиги букIана сакъатазда гьоркьоб тIобитIулеб букIин. Ай рахъун чIун рилъине кIоларел, коляскаялда ругел спортменазда гьоркьоб.
Кинав вугониги жиндир сахлъиялъе сакъатI ккарав чиги ккола нилъер жамгIияталъул мухъилав. Гьездехун букIине кколеб бербалагьи гьабиги ккола нилъер налъи. Унта-щокълъиялдаса божи бугев чи щивниги вукIунарелъул, гьезулги нилъеца цIунизе ккола букIине кколебгIанаб хIурмат.
Турниралда гIахьаллъи гьабуна Россиялъул ва цогидал улкабаздаса спортсменаз. Турнир рагьиялъул тадбиралда гIахьаллъи гьабуна живго Дагъистаналъул муфти, шайих АхIмад-афандиясгун МахIачхъала шагьаралъул нухмалъулев Жамбулат Салавовас. Жиндирго кIалъаялда АхIмад-афандиясде хитIаб гьабулаго абуна: «Нужерго мисалалдалъун кумек гьабулеб буго нужеца цогидазе жидерго гьунаралда божизе, рес кьолеб буго гIумруялъул жеги тIадегIанал даражабазде рахине», - ян. Ахиралдаги гьес ракI-ракIалъулаб баркала загьир гьабуна гьеб турнир гIуцIиялъе сабаблъун ккарав муфти, шайих АхIмад-афандиясе.
Турниралъул хIурматиял гьалбадерида гъорлъ рукIана Россиялъул столалда тIад теннис хIаялъул федерациялъул президент Ольга Семенова, Дагъистаналъул физическияб культураялъул министр Сажид Сажидов, диниял церехъаби, спортсменал, СВОялъул гIахьалчагIи ва цогидалги.
Турниралда бергьенлъи босаразе кьуна къиматал сайгъаталгун дипломал.
