Цеве ккеялъул гIаламат
Цеве ккеялъул гIаламат
ГIали-асхIабасдасан бицун буго: «Цо къоялъ дица гьикъана аварагасул ﷺ халифа Абубакарида: «Сундалъун дуе гьаб даража (макъам) щвараб, хIатта мун нижедаса цIакъ цевецин кканин?» - абун.
Гьес жаваб кьуна: «Нужедаса дун цеве ккана щуго жоялдалъун: 1. Дида гIадамал ратана кIиго тайпаялъул. Цо рукIана дунялалда хадур лъугьарал ва цогидал рукIана ахират бокьарал. Дица тIаса бищана Аллагь ﷻ вокьи. 2. Дун исламалде вачIаралдаса байбихьун дунялалъул тIагIамалъ гIорцIичIо. Щайгурелъул, Аллагьасул магIрифаталъул лазаталъ дун дунялалъул тIагIамалдаса машгъул гьавун вукIана. 3. Дун исламалде вачIаралдаса байбихьун лъеца дир къеч буссинчIо. Щайгурелъул, Аллагьасдехун бугеб рокьиялъ дун лъел тIагIамалдаса машгъул гьавун вукIана. 4. Щибаб нухалда дие кIиго гIамал кьедал, ай дунялалъул ва ахираталъул, дица ахираталъул гIамал тIаса бищулаан. 5. Аварагасулгун ﷺ дица гьалмагълъи гьабуна ва гьеб лъикIги ккана.
Гьел масъалабаздаса Абубакар киданиги ватIалъулев вукIинчIо. ХIатта гьев авараггун ﷺ нохъода цадахъ вукIана. Гьелъ букIана Абубакаридаги цIакъго къо бихьулеб букIараб, аварагасда ﷺ бихьарабго гIадин ва гьесдехун цIикIкIараб хурхен букIиналъе гIоло. Гьедин иш бугониги, гьев гьесдаса ватIалъичIо. Гьединго гьесдехун хилиплъиги гьабичIо, цо-цо асхIабзабазе гьеб ккараб гIадин».
