Хабалазда Къуръан цIали
Хабалазда Къуръан цIали
Цо-цо чагIаз абула хварав чиясдасан хабалазда аскIоб Къуръан цIализе бегьуларин, имам ШафигIиясул рагIиги бугин гьеб бидгIа кколин абураб.
ХIакъикъаталдайин абуни имам ШафигӀияс абуна: «Суннатаб буго хабалазда аскӀоб Къуръан цӀализе ва хварасе дугӀа гьабизе. Гьеб дугӀаялъе чӀезабураб заманги гьечӀо», - ян. («Ал-Умму» 1/322, «Хадим ар-РафигӀий ва Ар-Равзат», «Китабул жанаиз» 578 гьумер)
Аз-ЗагӀфаранияс имам ШафигӀиясда цIехана хабалазда аскӀоб Къуръан цӀализе бегьулищин абун. Гьес абуна: «Хабалазда аскӀоб Къуръан цӀалиялъул къварилъи гьечӀо», - ян.
Аз-ЗагӀфараний ккола ШафигӀияб мазгьабалъул кӀудияв имам ва имам ШафигӀил мутагӀалим.
Аш-ШагӀбияс бицана: «Ансаразул цояв хвейдал, гьел (гIадамал) унел рукӀана гьесул хабаде ва цӀалулеб букӀана Къуръан», - илан. (ибну Къайимил «Ар-РухӀ» 16 гь., шайих ГӀабдуррахӀим Ат-ТӀахӀанил «ХутӀабу ва Ад-Дурус» 73/20)
Таватуралдалъун бачӀана имам ШафигӀияс Лайс бин СагӀдил хабаде зиярат гьабунин ва гьесда аскӀоб тӀубараб Къуръанги цӀаланин абун. («ИтхӀафу Ас-Садатул Муттакъин», «Китабу зикрул мавт ва ма багӀдагьу» 14/283)
Имам Нававияс абуна: «Суннатаб буго хабалазде зиярат гьабидал Къуръаналдаса бажарараб жо цӀализе ва цӀалун лъугIидал хваразе дугӀаги гьабизе. Гьедин бачӀана имам ШафигӀиясдасан ва гьелда тӀад рекъана (нилъер мазгьабалъул) асхӀабзабиги», - ян. («Ал-МажмугӀ» 6/320)
Ибну ХӀажар Гьайтамияс абуна: «Чи вукъун хадуб хабада Къуръан цӀализе хьвади карагьатаб бугин абураб цо-цоязул рагӀи нахъчӀвараб буго. Суннатаб буго, имам ШафигӀиясдасан бачӀараб гӀадин, Къуръаналдаса бигьаял суратал цӀализе ва дугӀа гьабизе», - ян. («ТухӀфат» 3/199-200)
«Фатавал ХӀифнавий» абураб тIехьалда «Анкьалъ хабада аскӀоб яги хварасул рокъоб къулгьу гьабиялъул хӀукму щиб?» абураб суалалъе хъвалеб буго гьадинаб жаваб: «Гьедин гьабизе лъикIаб буго ва хварасе гьелдалъун пайда букӀуна», - ян. («МажмугӀул Фатава», «Фатал ХӀифнавий»)
«Мугънийялда» абун буго: «Хабалазде зиярат гьабидал, хварасда аскӀоб цӀалила Къуръаналдаса бажарарал суратал. Гьеб буго хабалазул суннаталдасан», - ян. («Мугъний» 2/58)
Имам АхӀмадица абуна: «Хабалазде лъугьиндал нужеца цӀале «Аятул Курсий» ва «Къул гьува Ллагьу АхӀад» - лъабго нухалъ, цинги абе: «Я Аллагь, гьелъул хиралъи хабалазул агьлуялъе буго», - ян. (КъуртӀубиясул «Ат-Тазкират» 274 гь., «ИгӀанат» 2/281)
Салафу-салихӀуназ абунин бицун бачIана, щив чи вугониги жинца 11 нухалъ Къулгьу цӀалун ва хабал агьлуялъе гьелъул кириги кьуни, гьесул мунагьал чурула гьеб хабалазулъ вукъун вугевщинав чи рикӀкӀун. («ХӀашиятул Къалюбий» 1/567)
Суратул «Бакъараталъул» байбихьи ва ахир, гьединго, «Ясин» цӀалани, гьеб лъикIаб бугила. («ХӀашиятул Аш-Ширвани» 3/202)
ХӀанафияз абуна: «Суннатаб буго хабалазде зиярат гьабурасе сурату «Ясин» цIализе ва гьединго сурату «Аль-ФатихӀа», сурату «Ал-Бакъараялъул» байбихьи «МуфлихӀиналде» щвезегӀан, гьединго, «Аятул Курсий» ва «Амана РРасул», сурату «Ал-Мулк», «Табарака», сурату «Ат-Такасур», 3-12 нухалъ «Къулгьу», лъаб-лъаб нухалда «Фалакъ» ва «Ан-Нас» цIалила. Цинги абила: «Я Аллагь, дуца щвезабе кири нижеца цӀаларалъул пуланав чиясе яги хабал агьлуялъе», - абун. (ЗухӀайлил «Ал-Фикъгьул Исламий» 2/1569)
