Муфтияталда данделъана

Муфтияталда данделъана

Болъихъ районалъул диниял хIаракатчагIазулгун дандчIвай тIобитIана Дагъистаналъул муфтияталда.

«Районалъул имамас абуна нуж киналго цо команда кколин. Нижеца абила нилъ киналго кколин цо командайилан», – абуна гьелгун дандчIварав муфтияталъул председатель ГIабдула Салимовас.

Гьес бицана цо 20 минуталъ цебе ахIун бачIанин шайих АхIмад-афандияс ва абунин нужеда киназдаго салам бицейин абун.

Хадуб ГIабдула Салимовас киназего баркала кьуна ва абуна нилъеца Аллагьасе рецц гьабизе кколин цадахъ рекъон хIалтIизе рес кьуралъухъ.

Гьединго ГI. Салимовас бицана муфтияталде гьарулел гIайибазул рахъалъ муфти, шайих АхIмад-афандил бугеб пикруги: «Жидерго квешлъиялдалъун, ургъунго гIайиб гIунтIизабулеб батани, гьеб буго лъикIаб гIаламат ва гьелъ бихьизабулеб буго нилъеца гьабулеб иш битIараб букIин», - ян.

Муфтияталъ гьабулеб хIалтIуе пайда бокьун гьабулеб критика батани, гьелъул рахъ кквезе кколин абун кIалъана муфтияталъул председатель.

Лъай кьеялъул хIалтIул бицунаго, ГI. Салимовас рехсана мугIалимзабазул цIаралда шайих АхIмад-афандица гьабураб каламги.

«Къад цоялде бащдаб хIалтIизегIан мугIалим дарсазда вукIунев ватани ва гьелдаса хадуб нахъеги унев вугони, гьеб бегьуларо. МугIалим кидаго вукIине ккола лъай кьолевлъунги лъай тIалаб гьабулевлъунги», - ян.

Муфтияталъул председателас бицана идараги власталъул тIалъиги цадахъ рекъон хIалтIиялъ кьолеб хIасилалъулги.

Гьединго абуна, муфтияс абунин тIарикъатги багьанаде ккун рикьиял гьарулездаса нуж рикIкIад чIайилан ва данделъиги лъугIизабуна шайих АхIмад-афандияс: «ХIакълъунго, Дагъистаналда кинабго букIине буго лъикI», - ян абураб каламалдалъун.