ГьитIинав хъвадарухъан
ГьитIинав хъвадарухъан
МухIаммадилъ цудунго загьирлъана Аллагьас ﷻ гьесие кьураб гьунар. Гьебги загьирлъана жеги яслиялде хьвадулаго. ГIажаибго гьесда лъазе байбихьана ракIалдасан кучIдул. Гьелдаго цадахъ байбихьана жинцагоги гьаризе.
ГьабсагIат МухIаммад ккола Россиялъул лъималазул Хъвадарухъабазул союзалъул членги. КучIдул гурелги МухIаммадица хъвала харбалги. Гьелги рижула бокьараб дандчIваялъул ва лъугьа-бахъиназул кьучIалда. Жеги 11 сон гурони бачIев гьитIинав хъвадарухъанас басмаялде бахъун буго «Трехцветное чудо» абураб тIехьги. МухIаммадица хъвала магIарул ва гIурус мацIазда.
МухIаммад гIахьаллъула батIи-батIиял тадбиразда, литературиял конкурсазда. Гьенир щварал шапакъаталги дагьал гьечIо. ГьабсагIат гьев цIалулев вуго Гъизилюрт шагьаралъул №1 лицеялда. Школалда тIоритIулелщинал олимпиадабазда цересел бакIал росула гьес, цIалулев вуго «5» къиматазда. Редакциялде гьоболлъухъ вачIиндал, нижеца цо чанго суалги кьуна гьесие.
– МухIаммад, бицея нижее мун киса кколевали ва чамабилеб классалде уневали?
- Дун ккола ЦIобокь-Миякьоса. ГьабсагIат дун вуго 5 классалда. ГIумруялъул буго 11 сон.
– ТIоцебе кинаб кечI яги хабар дуца хъвараб?
- ТIоцебесеб кечI хъвана ункъо сон бараб мехалда. Дица хъвана кечI бабае, ЦIорол Дадае. Гьединго гIумруялда дандчIварал лъугьа-бахъиназул кьучIалдаги хъвана харбал. Дирго «мишкалгун» ккараб, «Инсан» фондалда ккараб, тIоцебесеб мухь щведал ва цогидалги.
– Кинал тадбиразда ва конкурсазда гIахьаллъи гьабураб?
- Гъоркьиса Гъизилюрталда букIараб шагьаралъулго ифтаралда дица кечI цIалана. ГIахьаллъи гьабуна «Проза детям», «Кружева поэзии», «Народов много, а страна одна» ва цогидалги конкурсазда. Шапакъаталги щвана.
– Мадрасалде унищ мун?
- Школалъул цIали лъугIидал уна дун исламияб лагералде. Нижер Гъизилюрт районалда гьеб буго Нечаевка росулъ. Гьеб буго тIарикъаталъул устар Хучадаса Меселасул МухIаммад-афандиясул цIаралда. Исанаги ине ракIалда буго. Араб соналъ гьениб тIобитIараб конкурсалда кIиабилеб бакIги щвана дие.
– КIудияв гIедал щивлъун вахъине бокьилеб?
- Дир анищ буго тохтурлъунги вахъун, гIадамал сах гьаризе.
