Шаввалалъул хиралъи

Рамазан моцIалде дандеккун, шаввал моцIалъул 6 кIал инсанасул ихтияралда буго. ТIадегIанав Аллагьас гьеб анлъго кIал кквеялъулъ гIабдасе гIемерал пайдаби ва хиралъаби рихьизарун руго, хIатта рамазан моцIалъ кколел паризаял кIалазда хурхинарун руго. Рамазан моцIалъ ва гьелда хадуб шаввалалъул анлъго кIал ккурав чиясе сахаб соналъ кIал ккурабгIан кири хъвала ТIадегIанас.

Щайха шаввал моцIалъ хасс гьабун 6 къоялъ бихьизабун бугеб кIал кквезе? Гьелъие мухIканаб жаваб кьола хадусеб хIадисалъ. Аварагас абуна: «Рамазан моцIалъул кIал анцIгоялде бахинабун хъвала, шаввал моцIалъул анлъго кIал кIиго моцIгIан хъвала, гьеб кинабго цадахъ рикIкIани лъагIалил кIалалда бащалъула», - ян.

Суфяну Саврица бицана: «Чанго соналъ Маккаялда гIумру гьабун вукIана дун. Лъай-хъвай ккана Маккаялда гIумру гьабун вугев цо пуланасулгун. Щибаб къойил вачIунаан гьев ХIарамалъул мажгиталде. Къалъул какги бан, КагIба сверун тIавафги гьабун, салам кьун аскIове гIагарлъулаан. Къоял ана, нижер гьудуллъи щулалъана ва цоцазухъ ралагьун чIун рукIунаан щибаб къойил.

Цо къоялъ дир гьудул кутакалда унтана. Зияраталъе индал гIодобе биччараб гьаракьалдалъун гьес абуна: «Ле, Суфян. Дица васият гьабулеб буго, хведал дуца дир жаназа чуре, как бай, цинги вукъе. Жеги гьарулеб буго тIоцебесеб сордоялъ живго тоге дун. Хварасе гьеб сордо буго бищун захIматаб. Мункар-Накирас цIехелалде цебе, дир хабада аскIовги чIун, Аллагь цо вукIиналъул калам малъе дида», - ян.

Гьудуласул васият гьес абухъе тIубана дица. Къаси сардилъ хабада аскIов вукIаго дун гъогълъун ккана. Цо заманалда гьаракь рагIана: «Ле, Суфян! Дуде ккараб хIал гьечIо гьасул. Рамазан моцI лъугIун шаввал моцIалъул анлъго кIал кквеялъул баракат буго гьаб», - илан.

Макьидаса вигьиндал рахърахъалде валагьана, амма сверухъ щивго вукIинчIо. ЦIидасан какиеги чурун, гIибадаталде жувана. ЦIидасан кьижун ккедалги гьебго макьу бихьана. Лъабабизеги гьебго макьу бихьидал, дида якъинго бичIчIана гьеб шайтIаналдаса гуреб, Аллагьасдасан букIин. Гьелдаса хадуб рокъове унаго дица гьарана: «Я, Аллагь, шаввал моцIалъ анлъго кIал кквезе дуца дие кидаго тавпикъ кье», - ян. РахIму-цIоб гIатIидас дир дугIаялъе жаваб гьабуна».

(«Бадр Аддурар» тIехьалдаса)

ЖАБИР МАЖИДОВ