ШагIбан моцIалъул хиралъи
ШагIбан моцIалъул хиралъи
Гьале тIаде щолеб буго хирияб шагIбан моцI. Гьеб ккола хириял лъабмоцIил цояб. ТIадегIанав Аллагьас ﷻ гьеб моцI бижана хас гьабун нилъер хирияв МухIаммад аварагасе ﷺ.
Гьелъул хIакъалъулъ хирияб хIадисалда буго: «ШагIбан моцI дие хасс гьабун буго. Жиндир тIадегIанлъиялдалъун ва кIодолъиялдалъун БетIергьан Аллагьас ГIаршалда ругел малаикзабазда абун буго: «Я, Дир малаикзаби, нужеда бихьулищ, Дир лагъзадерица, Дир вокьулев аварагасул моцIалъул адаб-хIурмат гьабулеб куц? Дир къудраталдалъун ва тIадегIанлъиялъе бугеб ихтияралдалъун Дица Дирго рахъалдасан гьезие тIаса лъугьин ва гьезул мунагьал чури кьолеб буго», - абун. ШагIбан моцIалъ кIал кквей цIакъ беццараб гIамалалдасан букIиналъул бицуна гьаб хирияб хIадисалъги: «ШагIбан моцIалъ лъабго кIал ккурав чиясе ТIадегIанав Аллагьас алжаналъуб бакI бихьизабула».
Гьеб моцIалъ Аллагьас ﷻ нилъее сайгъат гьабула жиндирго рахIматги, лъикIал пишабазулъ битIккейги. Гьеб моцIалъ нилъер тIекъал, квешал пишабаздаса рикIкIалъиялъе, мунагьаздаса ратIалъиялъе бахъулеб хIаракат цIикIкIине ккола. Гьеб моцIалъ нилъеца тIадчIей гьабизе ккола лъикIал гIамалал гIемер гьариялде, гьабулеб тIагIат камил гьабиялде, Къуръан цIалиялде, хасго нилъерго аварагасде ﷺ свалат-салам гIемер битIиялде. Гьеб моцIалъ лъикIал пишабиги, Аллагьасе ﷻ гьабулеб тIагIатги гIемер гьабун, хIадурлъи гьабизе ккола хирияб рамазан моцIалда дандчIвай гьабизе.
Жакъа бусурбабазул гIамал-хасияталъухъ балагьун гIемерав чи исламалде вачIинадай-вачIинародаян щакдарулел ругеб мехалъ, жиндир гIамал-хасияталде кIвар кьечIого тей, Аллагьасе ﷻ тIагIат ракIбацIцIадго гьабунгутIи, исламалъе заралияб ишлъун лъугьунеб буго.
Бусурбанчиясул бацIцIадаб мисалалда куцазе ккеларищ нилъеца нилъерго лъималги. Исламалъул тIалабазулги нилъер хьвада-чIвадиялъулги пикру гьабураб мехалъ, нилъеда гьоркьоб цIакъго сурукъго бихьулеб буго кIигьумерчилъи, хъачIлъи, гьереси гIадал квешал хасиятал. Хирияв аварагасул ﷺ хIадис буго: «Мунапикъасул гIаламат лъабго буго: бицунелъул гьереси бицин, кьураб рагIи ккунгутIи ва гьабураб къотIиялъе хилиплъи».
ШагIбан моцI бачIиналдаса пайдаги босун, гьел гIаламатал нилъелъ ратани, гьездаса ратIалъизе хIаракат бахъиги буго нилъелъ, нилъ бусурбаби рукIиналъул гIаламатлъун.
Аллагьас ﷻ тавпикъ кьеги. Амин.
