Гиёҳдармонӣ ба беморони қанд
Сол аз сол шумораи гирифторони диабети қанд афзоиш меёбанд ва ин ба яке аз мушкилоти замони муосир табдил ёфтааст. Вале бисёре аз табибон бар онанд, ки болову пойин шудани сатҳи қанд дар хун “дар дасти худи шахс” аст. Яъне шумо метавонед бо риояи парҳез ва дигар фармудаҳои духтурон худро комилан солим эҳсос намоед.
Табиби мардумӣ Садриддиншоҳ Насриддиншоев чанд усули халқиеро пешниҳод мекунад, ки барои паст кардани миқдори қанд дар хун кумак мерасонад.
Тавсияҳои табиб:
Шахсоне, ки касалии қанд доранд, бояд ҳатман ба парҳез риоя намоянд, зеро бидуни парҳез табобат намудани ин касалӣ ғайри имкон аст. Шумо бояд аз хӯрдани шириниҳо, ангур, харбуза, анҷир, зардолу, бирёниҳо ва хӯрокҳои тезу тунд худдорӣ намоед. Парҳезро риоя карда, аз давоҳои гиёҳӣ истифода баред, сатҳи қанд дар хунатон баланд намешавад ва худро солиму бардам эҳсос мекунед. Инак, чанд тавсияи муфид барои паст кардани миқдори қанд дар хун.
Барои пешгирии гангрена
Дар ҳар як хона хамиртуруш ҳаст, тахминан 25 грамм хамиртурушро (дрож) бо як истакон ҷурғоти хонагӣ омехта карда, дар дили наҳор нӯши ҷон созед. Ин амалро муддати 10 рӯз давом додан лозим аст. Шумо бояд ҳамчунин ҳар рӯз гречкаро обпаз карда, бе намак ба андозаи иштиҳо ва тавонатон хӯред. Гречка қандро паст карда, хунукӣ ва карахтии пойҳоро бартараф месозад ва хатари гангренаро пешгирӣ менамояд.
Барои паст шудани қанд
Пӯсти лӯбиё – 40 грамм
Барги газна – 20 грамм
Барги тут – 40 грамм
Аз се як ҳиссаи (1/3) ин таркибро дар ним литр об муддати 10 дақиқа ҷӯшонед, сипас оташро хомӯш карда, монед як-ду соат истад. Гиёҳобро баъди ду соат соф карда, рӯздармиён 50-100-граммӣ нӯшидан гиред, қандатон муътадил мемонад.
Давоҳо аз барги дарахтон
Барги биҳӣ, барги чормағз, барги газна ва барги мушхорро ба андозаи баробар гирифта хушк кунед ва 2 қошуқ аз ин гиёҳҳои омехтаро дар ним литр об ҳамагӣ 2-3 дақиқа ҷўшонида, дарҳол оташро хомӯш намоед ва монед ним соат истад, баъдан гиёҳоби ҳосилшударо полонда, рӯзе 3 бор 50-граммӣ бинӯшед.
