Пайгъамбарин ﷺ кагъаз

Кьасумов Амир Мирзаевич,

Жулжагъ гъул.

РФ-йин жюрбежюр искусствойин ва литературайин конкурсдин лауреат ва дипломант:
Медаль Москва 1985.
Медаль Москва 1987.
Медаль Москва 1989. Дагъустан Республикайин культурайин лайикьлу работник (2004 й).

РФ-йин журналистарин Союздин член (2005 й).

РФ-йин уьмуми образованияйин лайикьлу работник (2006 й).

РФ-йин президентин грантдин сагьиб (2009 й). РФ-йин мялимарин устадвалин бина конкурсдин дипломант (1 степен, 2017 йис.) "Табасаран райондин улихь лайикьлувализ лигну" - медаль, 29.08.2024.

Персияйин

Паччагьдихьна

Кагъаз хьади

Ихь Пайгъамбри

Гьаур вуйи

Аьбдуллагь ибн

Хузайф кlурур.

Думу кагъзик

Дидикlнайи

Гьамцдар гафар:

«Кьудратлу вуй

Сар Аллагьдин

Ву ччвурнахъан,

Дугъан гьякь лукl,

Сар Аллагьди

Гьаъну айи

Мугьяммаддин

Терефнаан.

Ислягьвалар

Ишри учвуз,

Дюз рякъюъди

Гъягърудариз,

«Аллагь сар ву,

Дугъу гьаур

Ву пайгъамбар»

Кlури, тасддикь

Апlрудариз.

Эгер ккундуш

Яв ахират

Мюгькам апlуз,

Кьабул апlин

Уву ислам,

Мисал вуди

Варидариз.

Хъа дарапlиш,

Гунгьарин гъагъ

Хьибди увуз

Варидарин…»

Шагьди, дубхну,

Гьаму кагъаз

Гъячlябгънийи,

Деллу духьну,

Чlигъ гъапlнийи:

«Йиз ччвур - исикк,

Хъа чан – зиин,

Нифратлу лукl!»

Му ляхникан

Чахьна хабар

Гъурубкьиган,

Кlур Пайгъамбри:

«Ккадабхъричан

Паччагьвалра

Амриинди

Сар Аллагьдин!»

Кьабул гъапlу

Дюаь мугъан,

Гьациб кьисмат

Гъабхьи дугъан.

Ва Йемендиз

Хосровди чан

Гьау вакил

Кагъаз хьади:

«Учв пайгъамбар

Вуза кlури

Айи аьраб

Зухьна аькьин».

Пайгъамбрихьна

Кьюр чархачи

Хьади кагъаз

Гъафнийи ва

Гъапи дугъаз:

«Уву гъахуз

Дуфну ача».

«Закур гъачай», -

Дупну, гьау

Ихь Пайгъамбри

Му вакилар.

Гьаму вахтна

Гьапlу хабар

Аьршариан:

Персияйин

Шагь чан бали

Йивну гъакlну,

Душваъ гьамус

Шагь Шируй ву.

Йигъ ккудубшу.

Пайгъамбрихьна

Хъана гъафи

Му вакилар,

Дишла гъапи:

«Рякъюъ учlвуз

Вахт дубхьнахьуз».

Ихь Пайгъамбри

Хабар туву

Вакилариз:

«Хосров гъакlну».

«Фу кlури аш,

Мялум вунуз?» -

Гъал кади кlур

Вакилари.

Ихь Пайгъамбри

Жаваб туву:

«Йиз ччвурнахъан

Дебккай хабар,

Йипай душваъ:

Багарихьди

Йиз дин гъибди,

Вари йишвар

Аквнакк дерккди

Сар Аллагьдин

Амриинди».

Цlиб вахт гъубшу,

Персарира

Кьабул гъапlу

Ихь ислам дин.

Египетдин

Аьхюрихьна

Ихь Пайгъамбри

Гьау Хатиб.

Гьюрмат ади

Кьабул гъапlу

Мукавкисди

Чан гъалайиъ.

Дугъахь хьайи

Кагъзик кайи:

«Кьудратлу вуй

Сар Аллагьдин

Ву ччвурнахъан,

Дугъан гьякь лукl

Мугьяммаддин

Терефнаан.

Ислягьвал шул

Дюз рякъюъди

Гъягърудариз.

Увкан тlалаб

Вуйиз ислам

Кьабул апlуб.

Аллагьди вуз

Кьюб дережа

Рягьим апlур,

Дархьиш шулу

Вардин гунгьар

Увуз сариз».

Кагъзик кибтlну

Айи аят:

«Аллагь сар ву.

Тасдикь апlуз

Дугъаз икрам

Дапlну ккунду,

Жарариз ваъ».

Кагъаз дурхну,

Дугъу гьерху:

«Эгер гьаънуш

Сар Аллагьди,

Гьаз ккун апlдар

Жаза тувуб

Учв шагьриан

Утlуккдариз?»

Хатибди кlур

Мукавкисдиз:

«Иса ву, бай

Марьям бабан,

Гьаур ухьуз

Пайгъамбарди

Сар Аллагьдин

Амриинди.

Фукьан вушра

Читин гьялнаъ

Гъахьну думу,

Ккун гъапlундар

Кюмек дугъу».

Мукьавкьисди

Туву жаваб:

«Рягьимлу вуй

Сар Аллагьдин

Ву ччвурнахъан.

Мугьяммад ибн

Аьбдуллагьдиз

Мукавкисдин

Жаваб-кагъаз.

Ислягьвал вуз,

Гъурхунза ва

Гъавриъ аза.

Мялум вуйзуз

Пайгъамбарди

Гьаъну айиб.

Хиял вуйиз,

Шам шагьризди

Гъафну кlури.

Савкьатарра

Гьаъназавуз:

Пешкеш вуйиз

Кьюр дишагьли

Аькьюллу вуй

Хизандиан…»

Пайгъамбарин ﷺ кагъаз